Miembronan a goza na Cena di Pasco di Brazil Taekwondo Stichting

ORANJESTAD(AAN): Recientemente Brazil Taekwondo Stichting a tene su cena di Pasco na Centro di Bario Brazil y den un entrevista cu DIARIO,

master Alberto Klaber a splica cu tur aña esaki ta tuma lugar, pero debi na e pandemia di COVID-19 dos aña no tabata tin un cena di Pasco pa e miembronan.

E aña aki nan tabata pendiente pa tende su tabata permiti pa organiza e anochi y afortunadamente e cena por a tuma lugar.

“Mi ta hopi contento cu mi tin un sala cu varios medio di prensa cu a bin experiencia e cena di Pasco aki”.

Ta bunita pa wak cu semper prensa ta sostene deporte y specialmente Brazil Taekwondo Stichting, segun Klaber.

Pa loke ta 2021 e eventonan tabata limita, pero e rumannan Claver a sigui entrena y nan a bay Europa cu e intencion pa participa na e campeonato nacional di Hulanda cu lo a tuma lugar riba 11 di December.

Sinembargo, debi na e hecho cu e cantidad di caso di COVID-19 na Europa  a aumenta bastante, esaki a wordo cancela.

E rumannan Klaber no a gana premio despues na e Open Dutch Championship, pero na e Rosmalen International Taekwondo Open Joshua y Jourde Klaber  gana e medaya di oro.