Logro historico pa Aruba obtene medaya di brons den copa mundial

Atleta Kyra Hoevertsz cu gran logro na China

• Logra na evento grandi di Artistic Swimming World Cup 

ORANJESTAD (AAN): Diabierna a habri cu e noticia formidable procedente di Beijing na China, unda cu un atleta hoben di Aruba a logra di obtene un medaya di brons den un evento grandi di Artistic Swimming World Cup.

   Kyra Hoevertsz a logra haya e medaya di brons den e disciplina di ‘Solo Tech’.  Loke ta haci e noticia aki uno grandi, ta e hecho cu ta prome biaha den historia di deporte di landamento artistico, cu pais Aruba ta ricibi un medaya den un campeonato mundial.  Den su categoria, e medaya di oro a bay pa Huiyan Chu di China, y esun di plata pa Vasilina Khadoshka di Belarusia.

   E ta un logro grandi pa Aruba, sinembargo extra mas gigantesco pa Kyra Hoevertsz mes.  E ta resultado di su dedicacion di 18 aña largo di training y mehoramento como atleta, cu guia coherente y constante di coach Alva Torres. Y alavez no por descarta e dedicacion genetico cu e tin, mirando cu tanto su querida mama Esther Hoevertsz-Croes, y su famoso tanta Nicole Hoevertsz a yega di participa den landamento artistico na Olympiada di 1984 na Los Angeles.

   Kyra a sa di representa Aruba na diferente ocasion den pasado, y ta competi na eventonan di nivel mundial.  Awor cu el a obtene su prome medaya na nivel mundial, claro esaki automaticamente ta sigui habri mas porta pa e bira aun mas competitivo den futuro competencianan.