ORANJESTAD (AAN): Diaranson, november 5, 2025 nos peloteronan di Little league Aruba seleccion U8 a
sali rumbo pa Punta Cana pa representa Aruba den e competencia internacional “Big Boys 2025” na Punta Cana.
Aruba lo wordo representa pa 14 pelotero den e categoria U8 Little League Aruba. E seleccion ta consisti di diferente ekipo di Central League incluso peloteronan di RedMachine, Sabana Grandi Jets y Stars Aruba, tambe peloteronan cu tawata forma parti di Rockets anteriormente pero actualmente ta forma parti di ekipo Grasshoppers, y sin laga afor dos pelotero di e ekipo di Brazil Hawks.
Despues di un campeonato di Little League bastante fuerte, unda cu hopi di e peloteronan a bataya contra otro, awe ta subi vuelo hunto cu un solo meta, pa representa Aruba den grandi.
E team di Aruba ta consisti di Aiden Tromp, Yermaine Croes, Aiden Rodriquez, Clint Westerburger, Xyfer Stamper, Brayden Briesen, Axl Wester, Kai Wever, Samuel Arias, Eduard Flanegin, Zhaér Thompson, Siegmar Schwengle, Elijah Browne y Dayson Dreischor.
E ekipo aki ta wordo maneha door di Manager Eddy Flanegin (Sabana Grandi Jets) cu sosten Coach Marwin Briesen (RedMachine), Arsan Wester (Sabana Grandi Jets), Jair Thompson (RedMachine) y Ciriac Tromp (Grasshoppers).
Den nomber di peloteronan, nan kier a gradici e pueblo di Aruba cu a sostene e ekipo aki den gran forma, como tambe nan sponsors cu semper ta cu nan.
