ORANJESTAD (AAN): Arubaanse Voetbal Bond (AVB) ta orguyoso di por forma parti di e campaña ‘Dakota in Blue’ den
temporada di hubentud den luna di november, un iniciativa presenta pa S.V. Dakota, 131 Aruba y N.V. ELMAR. E proyecto aki ta un ehempel fuerte di con deporte hunto cu organisacionnan local y social por uni forsa pa crea un impacto positivo den nos comunidad, specialmente pa nos hubentud.
E temporada di hubentud ta un periodo crucial di desaroyo y crecemento. Durante e temporada aki, nos hobennan mester di sosten, guia y atencion di nos adultonan — incluyendo cuido pa nan salud mental. E campaña ‘Dakota in Blue’ ta enfatisa e importancia di salud mental, specialmente entre hobennan masculino, mirando datos di estudio y literatura Internacional, unda ta indica cu principalmente hende homber tin mas dificultad pa busca ayudo pa problemanan di salud mental. Un tema cu AVB ta considera esencial pa e futuro di futbol y bienestar di nos hobennan.
Como parti di e iniciativa, S.V. Dakota lo cambia su color tradicional geel cu preto pa e color blauw durante e luna di november. E cambio simbolico aki ta un gesto di union y conscientisacion, caminda tanto e ekiponan di Division Honor como U20 lo hunga cu e uniform blauw — representando speransa, sosten y salud mental. E uniformnan lo ilustra e logonan di 131 Aruba hunto cu N.V. ELMAR en celebracion cu su 75 aniversario. Hunto e organisacionan kier conscientisa e comunidad di Aruba tocante e importancia di salud mental.
AVB ta felicita S.V. Dakota pa e compromiso di bira un vocero visual den e tema tan importante di salud mental. Nos ta reconoce cu deporte tin un papel esencial den forma caracter, disciplina y resiliencia, y pa logra esaki bienestar di salud mental ta fundamental.
AVB ta stimula comunidad di futbol pa sigui e ehempel aki y pa continua promove un cultura di sosten, empatia y respet “on and off the field”.
Un comunidad fuerte ta cuminsa cu bienestar — mental den union.
Pa mas informacion tocante e campaña ‘Dakota in Blue’, por tuma contacto cu 131 Aruba via
- Website: 131.aw
- Instagram: @131aruba
- Facebook: com/131aruba
- Email: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
- Telefon: 588-6138 / 588-4011
