Iron Order a tene un Bike Ride chikito den fin di siman largo

SPEEDWORLD 

Saludos cordial na fanaticonan di deporte di motor.  Ata aki bo amigo Hubert ‘The Furai’ Tiel cu otro seccion di SPEEDWORLD.

   Den fin di siman largo, e organizacion local di Iron Order Aruba a tene nan “Iron Bash”, y a finaliza e dia cu un ride chikito.  Speedworld a topa cu nan den area di Piedra Plat pa Santa Cruz.  Segun un representante di Iron Order, sorprendentemente nan tabatin hopi bishitante di exterior, e.o. di Merca, hasta Alemania, Curaçao y Bonaire cu a uni cu nan.

   Nan a tene e Ride dedica na nan president cu ta sufriendo di quebrante di salud den Hospital despues di un accident, y e tin di tuma un proceso largo di recuperacion.

   E dia ey, nan a calcula cu casi 100 rider a subi caya.  Parti di e ride ta pa mustra e bishitantenan di Merca con e Iron Order local ta haci esaki na Aruba, como cu aki si bo por tin varios organizacion hunto ta uni den un Ride.  Pesey a tene e ride pa e bishitantenan mira cu e ta full diferente cu Merca.

   Iron Order na Aruba lo bay trata di mantene e tradicion, pa tur weekend di Pasco Grandi pa trece mas bishitante di Merca.  Pues ta mustra cu nan no ta djis core cu Bike rond, pero ta organiza evento social tambe.

   Pa resto di 2023 tin mas plan, y evento pa recauda fondo.  Iron Order tin di haci diferente actividad di recauda fondo pa resto di aña.