Federacion di Ahedres di Aruba a organisa nan Campeonato Nacional Hubenil

Cu un cantidad record di participante,

ORANJESTAD (AAN): Dianan 14, 15 y 16 di Juli, Federacion di Ahedres di Aruba (FAA) a organisa e Campeonato Nacional Hubenil, na nan cede Royal Plaza Mall. Un cantidad record di participante, caminda un total di 24 hoben entre 7 pa 18 aña a competi den e campeonato aki.

            Ganador absoluto invicto tawata Paul Villalba cu 6 punto, sigui pa dos hobencita Thamara

Sagastegui y Lesley Cielo cu a keda empata na segundo luga cu 5.5 punto cada un. E miho den categoria den cada categoria: U-16 Tylon Diaz, U-14 Brooke Lockhart, U-12 Mohit Sharma, U-10 Colin Koolman y U-8 Kayleigh Lumenier.

            Un Campeonato cu a culmina den un ambiente hopi ameno cu mayornan y tur participante, unda miembronan di directiva Perlishka Lockhart, Jose “Chelo” Pesqueira y e arbitro Lazaro Bueno a haci entrega di premio na e ganadornan.

            Por ultimo, danki ta bay na tur cu a contribui pa haci e campeonato aki uno exitoso. Stichting Sportsubsidie Aruba(SAA) cu a contribui grandemente pa realisa e bunita campeonato aki. Sin lubida cada mayor, hungadornan y Carol Williams-Pesqueira cu tawata organizadora di e campeonato.

            FAA ta sumamente satisfecho y kier a felicita tur participante pa e actitud deportivo, competitivo y disciplina cu a wordo desplega durante henter e campeonato.