Exitoso Representacion di Karatekanan di Aruba na Curaçao  

ORANJESTAD (AAN): Den fin di siman cu a pasa, diferente “dojo” (scol di karate) a participa na e competencia “Kyokushincai International Karate Championship 2023” na nos hermana isla Curaçao.

Aruba Karate Bond pa medio di su presidente, “sensei” Gustavo Velazquez y directiva, ta felicita tur atleta, instructor y mayor cu a biaha pa Curaçao y representa Aruba.

   Diferente scol di karate: Atletanan di “dojo” Ryu-Bu Kai Aruba, dojo Konishi, Shotokai Aruba, dojo Shocokan y SKIF Aruba Dojo Jin Sei Kai a participa den e categoria di “kumite” (bringamento) y a bin cu diferente medaya back Aruba.

   E tabata un experiencia inolvidabel. E atletanan Timothy Halley, Zinar Rubin, Sara-Mishe Croes, Elijah de Castro, Jakeyell Quandus, Reginald Yarzagaray, Nohlan Burke, Jahali Mirjah, Kyran Tromp y Maresha Tromp a duna tur loke cu tin y a yega Aruba cu 6 medaya total. Medaya di oro tabata pa Reginald Yarzagaray, Zinar Rubin, Jahali Mirjah y Kyran Tromp. Maresha Tromp a gana medaya di plata y Sara-Mishe Croes medaya di brons.

   Preparacion: E preparacion di e atletanan tabata den man di cada “dojo”. Sinembargo pa prepara e atletanan pa bay e campeonato cu mas determinacion y confianza propio, a pidi e colaboracion di e coach di Aruba Karate Bond pa e tambe train e muchanan. Coach Alberto Gonzalez Lujan a keda encarga cu e training di e ultimo simannan y a pone extra enfasis riba e aplicacion corecto di tecnica y e bon comunicacion entre coach y atleta.

   Orguyoso: Na cada competencia cu e atletanan asisti; nan ta haya mas experiencia y conocemento. Aruba Karate Bond ta contento cu e participacion di e atletanan, cu nan ta sigui practica y resalta den e deporte di karate tanto na Aruba como den exterior.