Eventonan di Aruba Hi-Winds ta ranca sali atrobe entrante Diaranson awor

E di 34 edicion lo tin hasta Mountain Biking e biaha aki

ORANJESTAD (AAN): Durante un conferencia di prensa convoca na Quinta del Carmen na Bubali, e organizadornan di Aruba Hi-Winds a mustra cu nan ta cla pa e competencianan tan spera atrobe.

   Despues di dos aña, Aruba Hi-Winds lo tin pa di 34 biaha e competencia mundialmente famoso aki.

   Manera ta conoci, debi na e pandemia di Covid-19 pa dos aña largo e evento a wordo cancela, pero pa 2022 e momento a yega pa start esaki bek.

   Aruba Hi-Winds tey bek y lo wordo inaugura riba Diaranson 25 di Mei 2022 na e beach cerca di Fisherman’s Huts cu musica en vivo, y lo finaliza Dialuna 30 di Mei cu entrega di premio na Paseo Herencia.

   Cu un directiva nobo, y tambe miembronan di comision, pa algun siman caba nan a cuminza traha cu yen entusiasmo pa e preparacion di e di 34 edicion di e competencia aki.  Nan patrocinadornan principal ta Successfully y tambe Vader Piet Windpark.

   Desde 1986 e evento di Aruba Hi-Winds ta trece e mihornan di mundo pa aki, y ta un colaboracion entre Aruba Hi-Windws, IFCA (International Funboard Class Association), Windracers Club Aruba, Sunfish Club, FX Sport, y Hubada Cycling Team, cu e meta uni pa promove deporte na Aruba.

   Como miembro di World Sailing, e organizacion IFCA ta autoriza pa entrega titulo di campeonnan mundial y continental.  Hopi careda y competencia lo por wordo mira for di beach, como tambe caredanan di long distance, y caredanan cu ta un tiki mas leu riba lama, lo por wordo mira via live streaming riba un pantaya grandi.

   Competencia di Windsurf:  For di Diahuebs te cu Diadomingo lo tin e Pan American y South American Championship, New Kids y SuperKids riba Diasabra y Diadomingo, y e Long Distance Race riab Diadomingo.

   E Kitesurfer mundialmente conoci Lasse Walker lo participa e aña aki tambe na e evento, ademas di e campeon mundial local Sarah-Quita Offringa cu ta bin specialmente pa esaki for di Europa pa participa.

   Atravez di añanan e evento di Aruba Hi-Winds a expande su mes y envez di djis tene competencia di windsurfing, e ta inclui mas tipo di deporte, e.o. Kite Surf, Kite Foiling, Paddleboarding, y tambe Mountain Biking.

   Competencia di Kite: For di Diabierna te cu Diadomingo lo bay tin competencia di Kiteboarding, Kitefoil, y Wingfoil long distance race, y e Big Air (pa e bula mas halto) lo ta Diadomingo 29 di Mei.  E ganadornan por haya atractivo premio cash, y e ganador di Big Air lo ricibi un regalo di bula cu parachute di Sky Dive Aruba.

   Competencia di Biking: Pa e amantenan di Mountainbike, lo tin un careda di strider pa esnan mas chikito riba Diasabra, y Diadomingo mainta trempan lo tin un bunita careda di Mountain Bike door di naturaleza.

   Competencia di Sunfish: E biaha aki Sunfish Club Aruba tambe ta forma parti di Aruba Hi-Winds, y nan competencianan lo bay ta Diasabra mainta na e beach di Surfside.

   Ademas di e caredanan, lo bay tin yoga tambe riba beach, un show di moda, diferente stand di cuminda, food court, y tur dia un happy hour cu DJ y bandanan musical, na e conocido lugar di Fisherman’s Huts.

   E organizadornan a indica cu tur hende ta bon bini pa mira e competencianan.