Evento di Aruba Open Beach Tennis 2023 a sobrepasa tur expectativa

ORANJESTAD (AAN): E evento di Aruba Open Beach Tennis 2023 a finalisa Diadomingo cu weganan final di campeonato,

y asina a conclui cu weganan di nivel halto hopi tenso, cu victorianan inespera, y prestacion remarcable cu a cautiva publico, y tambe demas hungadornan.

   Cada anochi durante e evento, publico grandi tabata presente pa mira e competencianan aki, y esey a keda mescos durante ocho anochi consecutivo.

   E evento deportivo a inclui varios torneo di Beach Tennis, cu diferente categoria cu a acapara participante di diferente nivel di habilidad.  E tabata consistentemente un evento inclusivo, cu a duna bon bini na hungadornan participante, intermedio, avanza, y tambe nivelnan profesional.

   Fanaticonan di Beacch tennis a mira batayanan intenso den e wega di ITF BT400, cu a yega na finalnan climatico riba Diadomingo.

   E spotlight di e evento tabata riba e resultadonan inespera di e competencia, ora cu varios team di top-ranking a sali afo trempan, y esey a habri porta pa competidornan nobo subi den ranking.  Por ehemplo, e Doubles Team Masculino number 1 na mundo for di Francia y Italia, a perde den kwartfinal.  E hungador femenino number 1 a perde tambe den semifinal.

   E tenista Aksel Samardzic di Aruba mes a demostra su habilidad den un final di singles contra e top hungador di Brasil, esta Andre Baran (#4 mundial), cu a culmina den un victoria di tiebreak cu 10-8 pa e Brasileño.  Samardzic actualmente tin ranking 19 mundial, a demostra resiliencia y habilidad durante e torneo.

   Samardzic a sigui briya den e Pro Mixed Doubles, ora el a bay hunga hunto cu Patricia Diaz di Venezuela.  E duo dinamico a avanza pa final, y na final a keda feliz cu e puesto di runner-up.

   Resultadonan: E ganadornan di e campeonato Aruba Open Beach Tennis 2023 ITF BT400 a worde celebra cu ceremonia di premio y a bin cu e siguiente resultado.

   Pro Men Doubles: E ganadornan ta Michele Cappelletti (Italia) y Andre Baran (Brasil).  Runnerup ta Daniel Schmitt (Brasil) y Fabricio Neis (Brasil).

   Pro Women Doubles: E ganadornan ta Nicole Nobile y Flaminia Daina (Italia).  Runnerup ta Veronica Casadei y Greta Giusti (Italia).

   Pro Mixed Doubles: E ganadornan ta Sophia Chow (Brasil) y Mattia Spoto (Italia.) Runnerup ta Patricia Diaz (Venezuela) y Aksel Samardzic (Aruba).

   Pro Men Singles: E ganador ta Andre Baran (Brasil).  Runnerup ta: Michele Cappelletti (Italia).

   Pro Women Singles: E ganador ta Sofia Cimatti (Italia).  Runnerup ta Giulia Gasparri (Italia).

   Hungadornan mas Valioso di Torneo (MVP) ta den masculino Andre Baran (Brasil), y den femenino ta Flaminia Daina (Italia).

   Nations Cup: E ganador a bira Brasil, y runnerup ta Italia.

   Trofeo y premionan a wordo entrega door di Patrick Melchiors di Aruba Tourism Authority, y tambe Ministro di Deporte Endy Croes.