E tabata un dia tristo pa esnan den mundo di deporte di motor! 

 Pa SPEEDWORLD tambe, momento di tristeza ora cu a mira e shersh Cadillac haci e ultimo recorido cu e gran baluarte Juan Kock riba Palo Marga Raceway Park.

   SPEEDWORLD ta sigui bisa semper, cu Juan Kock tabata e berdadero super-sparkplug riba dos pia cu tabata percura pa tur amante di mundo di motorsport por a sigui competi, por tin un lugar pa tene careda, y tabata busca solucion pa cualkier conflicto cu presenta su mes.

   Tabata Diabierna siman pasa cu a bira conoci, cu Juan Kock di The Hustle y tambe Mufflex Camaro, a fayece.  Juan ta e conocido cara cu tur coredor, fanatico, y hasta pueblo conoce!  Juan Kock ta ruman di Cado Kock ‘Mr. Big Joe’ y tambe conocido cantante Chicho Kock.  E ta omo di Magali Sanchez-Kock cu tambe a fungi como promotor di Drag Race.

   Palo Marga Raceway Park tabata e centro di universo pa Juan Kock, y e sa con importante tabata pa esnan di motorsport tin un lugar disponible unda nan por competi legalmente, evitando asina cu ta tene competencianan ilegal riba caya.  Juan Kock tabata ocupa puesto di Aruba Drag Racing Foundation (ADRF), y a haci hopi pa Aruba den e mundo ey.  E tabata e catalizador cu a empuha e organizacion di International Hot Rod Association (IHRA) a bin inspecciona y sanciona e pista di Palo Marga na Aruba na comienzo di decada di 2000 tambe.  Famia di Drag Racing na Aruba a perde un gran baluarte sigur.

   Hunto cu e shersh, por a mira algun vehiculo di drag cu tambe a acompañe riba e quarter-mile como un forma maximo di respet y honor.

   SPEEDWORLD ta expresa su mas profundo palabra di condolencia na tur famia, y esnan cu semper a pone cabez hunto cu Juan Kock pa asina yuda e isla chikito aki den Caribe bira algo grandi riba mapa mundial di Motorsport.