Durante e ABC – Open Karate Championship 2023 a keda demostra cu karate ta bibo na Aruba

ORANJESTAD (AAN):  Recientemente a tuma luga na Compleho Deportivo Frans Figaroa e Campeonato “ABC – Open Karate Championship 2023” di Aruba Karate Bond (AKB)

den colaboracion cu Aruba Sport Unie (ASU), Stichting Sportsubsidie Aruba (SSA) , Comite Olimpico Arubano (COA) y Lotto Pa Deporte.

            E mainta a ranca sali cu’n desfile di e paisnan cu tabata presente;  scolnan di karate di Aruba, Boneiro, Corsow y Suriname. E campeonato a conta cu mas di 130 karateka participando den diferente categoria.

            E competencianan di “kata” (tecnica di karate) y “kumite” (pelea of bringamento) tabata  fuerte entre e paisnan presente. Por a sinti e alegria y emocion di e publico presente na Compleho Deportivo Frans Figaroa. Otro categoria cu a causa hopi furor tabata esun di “Kumite Open Senior”.

            Tur pais a cay den premiacion y a bay cas cu medaya di tanto “kata” como “kumite”. Aruba a gana 81 medaya, Corsow a gana 31 medaya, Boneiro a gana 9 medaya y Suriname a gana 4 medaya. AKB ta contento cu tur “dojo” (scol di karate) miembro y no miembro cu a participa, igualmente tur coach y referee local y internacional cu a yuda engrandece e campeonato.

            Durante e “ABC – Open Karate Championship 2023” a keda demostra cu karate ta bibo na Aruba y cerca e islanan ruman. Y cu dedicacion y disciplina ta duna su fruto na final di dia. Un danki ta bay specialmente na tur mayor cu ta hiba nan yiunan training y ta apoya nan yiu den e bunita deporte di karate. Palabra di pabien na tur “sensei”, coach, scol di karate y karatekanan di Aruba, Boneiro, Corsow y Suriname.