Diahuebs tabata un dia historico pa SV La Fama

Despues di 1 aña di trabou intensivo:

ORANJESTAD (AAN):  Diahuebs mainta, SV La Fama a marca un paso sumamente importante y historico pa loke ta trata renobacion y reconstruccion di infrastructura di SV La Fama, cu ta den un estado critic y deplorabel. Directiva di SV La Fama for di comienso di nan periodo nobo a indica, cu nan tin plan grandi pa SV La Fama y specialmente e mucha- y hobennan di Savaneta cu ta encanta e deporte di futbol.

Maneho y Vision Nobo

            Directiva a traha hopi duro for di 2024 riba restructuracion interno y delinea hopi proceso y maneho cu tabata completamente desalinea y sin vision pa futuro. Mester a paga hopi debe atrasa pa pone tur cos na ordo y tambe maneho interno tabata crucial pa enfoca riba dje. Ainda Directiva ta trahando pa sigui fortalece y structura esaki mas cu ta posibel, pa asina por garantisa un maneho efectivo, transparente y responsabel.

            Un di otro puntonan cu directiva a traha hopi duro tambe riba dje, tabata pa reconstrui y renoba henter e club di SV La Fama. E trabaonan a inicia cu prome fase aki y ta premira pa termina pa fin di augustus 2025. Banda di renoba henter e club, directiva di SV La Fama tambe ta bay traha un propio gym pa e hungadornan por uza. 

Colaboracion y contribucion di comunidad

            Despues di a reuni cu varios stakeholders, directiva di SV La Fama por a inicia cu su proyecto di reconstrui e club mes, traha un gym como tambe traha un mini-turf riba parti di tereno di SV La Fama. Esaki sigur no tabata posibel sin e contribucion enorme di algun stakeholders, cu a compronde y sostene e vision di directiva di SV La Fama, esta: RR Repair & Excavation, Otis Elevators, Roy Winterdaal y su team, Bon Bini Cargo, Andmar Manpower Services y Myown Construction. Nan a percura pa coopera y contribui cu e bunita causa di reconstruccion y renobacion di SV La Fama pa nos mucha- y hobennan amante di futbol na Savaneta.

            Esaki ta un muestra cla, cu ora un directiva tin un vision y pasion pa haci algo y ta presenta su proyecto na un forma sostenibel y duradero pa bienestar general di un comunidad, cos grandi por sosode.

            Finalmente SV La Fama kier gradici di curason cada hungador di chikito te grandi, cada mayor y fanatic y tur cu ta duna un sosten na nos sea ta den labor, ekipo of material. Sin boso aporte y confiansa, esaki sigur no tabata posibel. Pa ora cu temporada nobo inicia, SV La Fama ta premira pa tin un gran parti di e club y mini-turf cla y asina ricibi tur su hungadornan, fanaticonan y henter comunidad y amante di futbol.