Cruyff Court Denzel Dumfries lo sigui inspira hobennan haci deporte

Parlamentario di MEP Darlaine Erasmus:

ORANJESTAD (AAN): Manera DIARIO a trece dilanti caba, Diaranson atardi na Parke Curason na Jaburibari a tene reapertura di e cancha deportivo full renoba y cu awor ta carga e nomber di Cruyff Court Denzel Dumfries.

   Minister Endy Croes hunto cu Johan Cruyff Foundation, IBiSA, FFD, FCCA y AVB a percura pa e reapertura di e cancha aki.

   Un atardi cu yen di discurso hopi motivador, emocionante y cu gran elogio pa Denzel Dumfries. Un persona cu ta inspira nos hobennan den e deporte di voetbal y cu Aruba ta hopi orguyoso di dje. Denzel Dumfries no por tabata na Aruba durante e reapertura di e cancha, pero si a pasa un video unda e por a dirigi su mes na tur esunnan presente.

   Segun Darlaine Erasmus di MEP, sigur un momento hopi bunita unda e por a mira e alegria riba cara di tur hende y principalmente e hobennan cu ta haci uzo di e cancha diariamente. E cancha aki ta existi pa 16 aña caba y ta momento pa haci un renobacion.

   E cancha aki ta aportando grandemente na e bon desaroyo di nos hobennan riba e parti di nan salud, pero tambe e parti social unda nan por cera amistad sano, pasa momentonan agradabel cu otro. E pueblo di Paradera en general ta hopi agradecido cu e proyecto aki y otro actividadnan den e parke cu ta tumando lugar.

   “Mi kier termina felicitando Minister Endy Croes hunto cu Johan Cruyff Foundation, IBISA, FFD, FCCA y AVB cu traha hunto pa asina por logra e bunita proyecto aki pa tur cu ta haci uzo di Parke Curason,” Parlamentario Erasmus a finaliza bisando.