Comite Olimpico Arubano a reuni cu directiva nobo di Federacion di Atletismo

Pa eleva nivel di atletismo

ORANJESTAD (AAN): E siman aki, Comite Olimpico Arubano a reuni cu e directiva nobo di e federacion nacional di atletismo, Aruba Athletics Federation (AAF). E reunion aki a bin a peticion di e directiva nobo di AAF, cu ser eligi dia 12 di October ultimo, pa asina por cera conoci cu e miembronan nobo cu lo ta encarga awor cu e maneho di e federacion.

   Representando e federacion den e reunion tabata presente Anecy Toussiant cu ta e Presidente, Jairo Dijkhof cu tin e funcion di secretario y Fernando de Graf cu a keda encarga cu e tarea di tesorero.

   E reunion aki sigur tabata di hopi balor agrega, como a duna un splicacion amplio di diferente proceso di COA, unda e integrantenan nobo di e federacion por a compronde e procesonan cu ta tuma luga, na nivel tecnico, financiero y di maneho. Temanan importante cu a papia di dje durante e reunion a centra nan mes mas rond di e planificacion a plaso corto y largo, ademas di construi un strategia pa asina por traha procesonan concreto cu bista riba desaroyo pa yega na e metanan cu lo ser stipula den e planificacion. Banda di esaki, a duna un splicacion amplio di e proceso tecnico, unda cu den preparacion pa aña 2025, tin algun documento importante cu tin cu wordo entrega conforme e rekisitonan di COA, pa asina presenta lista di posibel atleta cu por forma parti di COA su delegacionnan pa e diferente Weganan den e Ciclo Olimpico nobo.

   Di banda di AAF, mester bisa cu e directiva nobo ta mustra determina di kier aporta na un mihor federacion, asina elevando e nivel di atletismo na Aruba. Un di e metanan principal di AAF ta pa eleva e nivel general di e entrenadornan local, incluyendo esunnan di e diferente clubnan miembro, asina brindando un apoyo unda cu tur entrenador y alabes tur atleta por beneficia di dje.

   Banda di esaki, tambe lo dedica hopi tempo y energia mehorando e procesonan interno como federacion, pa asina finalmente por ofrece un mihor nivel di servicio na tur grupo di interes den e mundo di atletismo. COA ta desea e grupo nobo aki di AAF hopi exito cu e tareanan nan dilanti, y manera semper ta bisa, nos portanan ta habri pa cualkier cos cu tin mester.