Comite Olimpico Arubano a reuni cu Directiva nobo di Aruba Softball Bond  

ORANJESTAD (AAN): E siman aki den sala di reunion na Comite Olimpico Arubano (COA)a reuni cu miembronan di directiva nobo di “Aruba Softball Bond”.

E directiva nobo a ser eligi durante e ultimo asamblea di e federacion na final di aña 2025 y ta den proceso di structura tur informacion y proceso pa asina traha riba un plan a plaso largo pa desaroyo di e deporte. Durante a reunion a combersa cu Presidente Mariellie Thiel, Vice-Presidente Renata Maduro y Secretaria Erisah Vishnudatt cu ta mustra hopi entusiasmo di kier traha den bienester di e deporte.

   Durante e reunion a combersa riba diferente tema, entre otro e proceso tecnico deportivo. E proceso tecnico deportivo ta encera e entrega di plan di entrenamento y otro documentonan cu tin di haber cu e preparacion y participacion di e atletan. Banda di esaki, a splica e structura di eventonan, unda campeonatonan ta cay bou di responsabilidad di e federacion y e Weganan di e Ciclo Olimpico ta responsabilidad exclusivo di un Comite Olimpico Nacional.

   A sigui na splica e proceso mara na e proceso tecnico, cu ta e participacion na Weganan di e Ciclo Olimpico como TeamAruba. Aki a splica den pleno transparencia con e proceso ta cana y e criterionan cu tin den luga pa cu e psibel participacion a base di e expectativa di resultado.

   Finalmente a trata e tema di gobernansa, unda a splica e importancia di participa na no solamente e asambleanan di COA, si no tambe esnan di e organizacionnan regional y internacional di e deporte, como aki ta crea lasonan importante cu e personan cu ta maneha e deporte na e nivel internacional. Cu esaki por logra na acuerdona di colaboracion pa asina sigui yuda desaroya e deporte localmente. Banda di esaki a splicanan cu COA a actualisa su propio statutonan y di e diferente cursonan di maneho cu ta ofrece, manera e “Capacity Building Training” y e “Sport Administration Course”.

   COA ta gradici Aruba Softball Bond pa e reunion y cu esaki duna inicio na un cooperacion ameno den bienestar di softball y deporte en general na Aruba.