Secretario General di COA, Nicole Hoevertsz:
ORANJESTAD (AAN): Comite Olimpico Arubano (COA) desde aña pasa a crea su propio Comision di Safe Sport, consistiendo di cinco persona, cu lo tin un rol importante den proteccion y bienestar di atletanan cu ta representa Aruba den evento deportivo internacional.
Durante un entrevista recien cu DIARIO, Secretario General di COA, señora Nicole Hoevertsz, a splica cu prome cu e comision por funciona completamente, su miembronan mester pasa pa un proceso di capacitacion profesional y specialisa.
Segun Hoevertsz, dos miembro di e comision ya a cuminsa cu diferente curso internacional. Entre nan tin Irina Croes, kende a sigui capacitacion na Universidad di Chile, FIFA y U.S. Center for SafeSport.
E intencion ta pa tur cinco miembro di e comision ta debidamente prepara y capacita prome cu e siguiente Weganan Panamericano, cu lo tuma luga otro aña na Lima, Peru.
Hoevertsz a indica cu capacitacion ta un parti esencial di e proceso, considerando cu no ta suficiente pa solamente nombra personanan den un Comision di Safe Sport. Nan mester dispone di e conocemento y preparacion necesario pa atende situacionnan cu por presenta den ambiente deportivo.
Un otro paso importante den e proceso di proteccion di atleta ta inclusion di un Safe Sport Officer den delegacionnan di COA.
Hoevertsz a splica cu, desde Weganan Panamericano Junior, COA tin e obligacion di inclui un Safe Sport Officer den cada delegacion cu ta biaha bou di responsabilidad di Comite Olimpico Arubano.
E funcionario aki tin como tarea yuda cu prevencion di incidente, identifica posibel situacionnan di riesgo y ofrece sosten ora un atleta of otro miembro di delegacion enfrenta un situacion cu por afecta su siguridad, dignidad of bienestar.
E enfoke no ta solamente riba bienestar fisico di atleta, pero tambe riba nan bienestar mental y e derecho di participa den deporte den un ambiente sigur y respetuoso.
Cu capacitacion di su miembronan y inclusion di Safe Sport Officers den delegacionnan, COA ta sigui establece structuranan necesario pa fortalece proteccion di atleta y aplica e principio di Safe Sport den deporte Arubano.
