COA a reuni cu ekipo di Natacion Artistico di Aquatics Federation

Ekipo di Natacion Artistico ta cla pa e siguiente reto

ORANJESTAD (AAN): Recientemente Comite Olimpico Arubano a tene un reunion riba nivel tecnico cu e comision di Aruba Aquatics Federation (AAF) cu ta encarga cu e deporte di Natacion Artistico. Durante e reunion a conta di e proceso actual di entrenamento den preparacion pa nan participacion na e Weganan Centroamericano y di Caribe, Santo Domingo 2026.

   Cu bista riba e siguiente Weganan, ekipo di Natacion Artistico hunto cu entrenadora Kimberly Vinck y entrenadora di Ukraina Iryna Grebennikova ta den un proceso intenso di entrenamento, combinando no solamente sesionnan den piscina, si no tambe hopi trabao di preparacion fisico den gym ademas di traha riba nan habilidadnan acrobatico a traves di entrenamento di e deporte di gimnasia. Mester bisa cu tur e atletanan den e ekipo ta bon motiva y ta mira un bon progreso den nan rendimento.

   Comite Olimpico Arubano (COA) ta contento di mira un ekipo asina motiva y ta desea nan hopi exito durante henter e proceso.