Campeonato Nacional Femenino y Masculino di ahedres riba un nivel espectacular

ORANJESTAD (AAN): Federacion di Ahedres di Aruba (FAA) a clausura nan Campeonato Nacional Femenino y Masculino.

Un campeonato cu a tuma luga pa dos weekend di 9 rond y un total di 20 participante. Como invitado di honor nos tawata tin Sr Enrique Jacopucci y tambe minister Ursell Arends cu a haci e movida di honor.

            Campeonato Nacional ta wordo hunga pa e 10 miho hungadornan masculino y femenino activo. Den e campeonato aki, tur hungador ta hunga contra otro durante 9 wega den nan respectivo categoria y ganador absoluto ta bira e hungador cu a acumula mas punto durante e campeonato.

            Annelaine Jacobs un bes mas a titula campeon den e categoria Femenino, sigui na segundo luga pa Lourdes Moreno y Brooke Lockhart cu a conkista e tercer puesto. E categoria di masculino tambe tawata tin un bon bataya den cual Juan Pablo de Mey a keda corona como campeon di e categoria, sigui na segundo luga pa Jose Pesqueira y Frederik Chaudron a keda na di tercer luga pa sistema di desempate.

            Manera tur aña, FAA ta brinda tur su miembronan e oportunidad pa demostra nan talento y amor pa e deporte di ahedrez, brindando un espectaculo na nivel nacional. Un danki sigur ta bay na tur cu a contribui pa haci e campeonato aki uno exitoso, sin laga afo organisador di e torneo Sra Carol Pesqueira y Arbitro IM FA Lazaro Bueno.

            Federacion di Ahedres ta sumamente satisfecho y kier a felicita tur participante pa nan desempeño durante full e campeonato aki.