Camilo Peña cu hat trick y Dakota a suta Caravel 8-0

ORANJESTAD(AAN): Den fin di siman e equipo di Dakota a duna Caravel un sota formal di 8-0, den division di honor di futbol.

Den di 3 minuut caba Camilo Peña a pone e score na 1-0 y den di 14 minuut tabata Peña mes kende a anota e 2-0.

Ora cu apenas 2 minuut despues Ricky Hodge a anota e 3-0, Caravel a cuminza perde speranza y esaki a bira peor ora cu den di 45 minuut Peña a anota e 4-0, pa completa su hat trick.

Randall Gross den di 73 minuut a anota e 5-0, despues di cual Hodge a anota atrobe pa pone e score na 6-0 den di 77 minuut.

Daryl Nelson a anota e 7-0 den di 82 minuut, mientras cu den di 91 minuut Gross a anota su di dos gol di wega pa pone e score final na 8-0.