Bikers di Curaçao y Aruba gozando weekend na Aruba

SPEEDWORLD

Feliz Dia di Himno y Bandera na mi fiel lectornan di SPEEDWORLD, cu boso amigo Hubert ‘Furai’ Tiel, sperando cu boso a goza inmensamente ayera di tur actividad crioyo rond di e isla.

   Saludo special tambe na tur Bikers procedente di hermana islanan di Curaçao y Bonaire, kendenan a core rond den tur skina di Aruba desde Diahuebs caba.

   Speedworld tabata presente na Warehouse di FAST Shipping unda e unloading di containernan procedente di e dos islanan a tuma lugar.  Por a mira cu e vehiculonan riba dos wiel a bin bon empaketa den nan transport frame, y na forma cuidadoso e Forklift Operatornan a saca nan di container.

   E motorcyclenan a yega Aruba pa diferente Camacuri Harley Davidson Group Rides e weekend aki, relaciona cu Dia di Himno y Bandera.  Ya caba Diaranzon a saca algun Bike di Curacao y Bonaire, y Diahuebs a saca e restonan.

   Un grupo grandi di Bikes bishitante, y Speedworld a nota cu tabatin hopi Sportsbike tambe cu a yega Aruba, y esakinan ta cla pa participa den e Show di Drifting cu lo tuma lugar riba Palo Marga.

   Pa Speedworld, tabata great pa topa bek amigonan di motor di islanan ruman, kendenan Diahuebs anochi a bay inscribi pa e Ride, y Diabierna a core rond di e isla cu escolta policial.  Nan lo tin Ride tambe riba Diadomingo, y otro Ride riba Dialuna.  Nan a bin pa festeha hunto cu Aruba, y esey ta super cool.