ORANJESTAD (AAN): Awe Diasabra 12 di april awor lo cuminsa un tremendo sambombaso di domino aya n’e palacio di pega piedra net n’e grens entre Calabas y Kudawecha,
nada menos cu e mundialmente famoso Domino Square Garden! Cuatro team lo enfrenta otro den estilo di knockout pa wak ken na final lo corona su mes campeon den e 4x4 torneo aki. Nada menos cu Biba Lekker DT, Sero Blanco DT, Pluma Gang DT, y Red Stone DT lo bay enfrenta otro den un challenge super interesante!
Awe Diasabra cuminsando pa 8’or di anochi, lo ta bay tin e prome bataya cu ta entre Biba Lekker DT y Sero Blanco DT. E ganado lo sigui pe gran final dia 3 di mei. Dia 26 di april lo ta bay tin e di dos encuentro caminda Pluma Gang DT lo enfrenta e “beruchte” ekipo Red Stone, e unico ekipo cu Inteligencia Artificial cu ta uza WIFI pa manda seña! E bataya aki tambe lo cuminsa exactamente 8’or aya n’e famoso Domino Square Garden. Aki lo determina e otro finalista cu lo clasifica pa bay e gran final diasabra 3 di mei proximo.
Ken lo clasifica? Cua ekipo keda bati pecho resto di aña como campeon? Shonnan, manera semper na Domino Square Garden, esaki ta priminti di ta otro sambombaso espectacular. Manera semper, entrada ta gratis pa pueblo en general y durante halftime semper e snacknan lo lora manera pan cayente completamente por nada p’e fanaticada presente!
Den “wandelgangen” tin papia cu drinks y snacks lo lora extra e biaha aki ya cu tin “externe hulp” den wega! Asina ta, fanaticada di “cutting edge domino” yega awe 12 di april p’e prome encuentro dje torneo 4x4 entre Biba Lekker DT y Sero Blanco DT! Yegaaa!
