AVB tin di dicidi ki lo pasa cu wega final di U17

RCA tabata ganando cu score di 2-0 - ORANJESTAD (AAN): Dialuna anochi den Stadion Guillermo Trinidad na Dakota, tabatin e wega prepara pa final di Campeonato di Futbol pa Division U17 di Futbol. 

E dos teamnan cu a yega final ta RCA U17 vs. Santa Fe U17.

   E wega a cuminza cu e ceremonia, unda e tres referee ta cana mas dilanti, saliendo for di camerin hunto cu e hungadornan nan tras.

   E dos tribuna banda pabao di Stadion tabata bashi.  Solamente e tribuna banda pariba a wordo usa pa fanaticonan di ambos team.

    Wega a cuminza cu Santa Fe su team ta scop direccion panort, y for di ora cu bala a cuminza lora, por confirma di con nan dos ta riba veld pa e wega di campeon, como cu tur dos tabata bon, cu mesun forza, y tabata domina bala, haciendo pasenan basta bon, y kitamento di bala estilo profesionalnan.  Tambe tabatin varios tiro riba goal, pero ningun a drenta.

   Manera ta conoci, e duracion di un wega di hobennan U17 ta total di 80 minuut.  E prome mitar a drenta pues na di 40 minuut, y ningun team a anota goal.

   E di dos mitar a cuminza unda tabata notable cu tur dos banda a bira mas ancioso pa anota goal.  Wega tabata bay basta limpi sin ningun problema.

   E prome goal a cay na di 65 minuut, ora cu RCA a cobra un free kick den direccion di goal, y e bala a bay, desvia, y aunke defensa di Santa Fe a trata na evita esey, e bala a lora y drenta den goal.  Asina RCA a habri e score cu 1-0.

   Wega a bolbe start y ni 4 minuut despues, un foul a wordo cometi den area penal, y corectamente RCA a ricibi un penalty.  Na di 70 minuut di wega, RCA a cobra e penalty pa asina e wega a bira 2-0.

   Den menos di 30 seconde cu e goal aki a drenta, mientras cu e resto di RCA ta celebrando e anotacion, diripiente a mira con hungadornan di Santa Fe a core bay riba un solo hungador di RCA cu tabata canando ainda cerca di goal.  Di eynan un free for all a start y wega a stop.

   AVB a dicidi cu nan lo no tuma ningun paso e anochi ey mas, como cu tin di warda rapport pa dicidi kico pa haci.  Pues e trofeo di ‘Campeon’ y tambe di ‘Sub-Campeon’ poni riba e mesa a wordo warda bek.

   E wega tabata falta solamente 10 minuut pa finaliza, y por a mira esnan di RCA ta ilustra cerca dirigentenan, cu ya caba nan tin 7/8 di e tempo hunga y cu esey nifica cu nan ta bira ganador di e wega.  Pero segun regla, AVB a indica cu nan tin di warda e rapport di e Coordinador di Wega (Match Coordinator), y tambe rapport di cuerpo di Referee riba e sucedido, prome cu nan tuma un decision.

   Na final, sea nan lo declara RCA victorioso cu e score di 2-0 den 70 minuut di wega, of lo mas extremo, ta pone nan hunga di nobo pero cu stadion sin publico.  E chens pa escoge e ultimo opcion ey ta hopi minimo.

   Toch por a mira e hungadornan di RCA ta sali cu sentimento cu nan ta campeon caba di U17, y ta djis e trofeo nan ta wardando riba dje.