ATCO Indians a titula campeon di baseball Double-A

ORANJESTAD(AAN): Despues cu Red Machine a gana ATCO Indians pa keda bibo den e final di baseball Double-A Diabierna, Indians a gana Diasabra pa gana e serie di best of 7 4-2.

Red Machine kier a empata e serie 3-3 pa bay un di 7 wega, pero na final ATCO a gana Diasabra anochi cu e score di 11-6.

Ora cu e playoffs a wordo para, Indians tabata tin un ventaha di 2-1 den e serie.

Diahuebs Indians a gana 8-7 y Diabierna Red Machine a gana 10-3.

Diasabra ATCO a bay ariba 2-0 y Red Machine na dado momento a tuma un ventaha di 3-2.

Sinembargo, Indians na dado momento a dicidi cu nan lo no permiti e serie bay 7 wega.

En total nan a bati 18 hit, contra apenas 5 di Red Machine.

Pitcher ganador tabata Gerald Tromp y pitcher perdedor tabata Julio Hernandez.

Mihor bateadornan pa Red Machine tabata Marcson Castro 1-1, Darwin Escobar 2-1, Mac Aimsy Louis 3-1 y Filbert Thiel 3-1.

Pa Indians e mihor bateadornan tabata Eugene Helder 5-4, Chee Fai Cheong 4-3, Jerold Martijn 5-2, Joshua Ramada 5-2, Jason Orman 5-2 y Francis Kelly 1-1.