ATCO Indians a gana di 4 wega tambe pero debi na protesta ainda oficialmente no ta campeon

ORANJESTAD(AAN): Diamars anochi ATCO Indians a gana Red Machine 7-6 y como cu esaki tabata nan di 4 triunfo den e serie final di double A di best of seven, nan mester ta campeon di Aruba pa temporada di 2022.

Sinembargo, ABBA a indica cu e comision di protesta ta ocupa cu dos protesta cu a wordo manda aden y cu pesey ainda no por declara ATCO campeon ainda.

Bastante tabata e criticanan riba henter e asunto aki, unda cu hende entre otro a bisa cu ainda baseball na Aruba tin demasiado regla anticua.

Otronan ta bisa cu e asunto di protesta cu casi tur aña ta tuma lugar ta un di e cosnan cu ta matando double A na Aruba, si e no ta morto caba.

Pa loke ta e wega ATCO tabata tin 11 hit y 1 error, mientras cu Red Machine a caba cu 12 hit y 1 error.

Pitcher ganador tabata Gerald Tromp y pitcher perdedor tabata Amadel Nicolaas.

Mihor beteadornan pa ATCO tabata Kelvin Silvania 3-2, Jerieel Rafael 4-2 (1 HR), Joshua Ramada 4-2 y Marc Diaz 2-2.

Pa Red Machine e mihor bateadornan tabata Daniel Fernandez 4-3, Julio Hernandez 4-2 y Djurwin Croes 3-3.