Aruba U14 ta cera CFU cu cabes na halto

PUNTA CANA — Seleccion Boys U14 di Aruba a cera su participacion den e CFU U14 Challenge Series cu un tremendo empate 3–3 contra St. Kitts & Nevis.

E resultado no tabata suficiente pa avanza pa siguiente ronda, pero e prestacion di nos muchanan durante e torneo a confirma algo importante: Aruba tin un generacion di futbolistanan cu enorme potencial.

Aruba a domina gran parti di e encuentro y a logra construi un ventaha di 2–0, cu golnan di Phillip Kooi y defensor Alexander Croes.

St. Kitts & Nevis a responde cu un estilo fisico, velocidad y contra-atakenan peligroso, poniendo presion riba defensa di Aruba y logrando cambia e curso di e partido.

Pero Aruba no a entrega.

Te den e ultimo minuutnan, nos seleccion a sigui lucha cu caracter y determinacion. Den tempo extra, Dominique Bijl a marca e gol cu a pone e marcador final na 3–3.

Cu falta di punto, e empate no tabata suficiente pa Aruba avanza. Seleccion U14 ta sera su torneo cu dos empate y solamente un perdi.

Mas alla di e resultado final, e seleccion aki a mustra calidad, disciplina, caracter, talento y mentalidad competitivo. E hungadornan, cuerpo tecnico y coachnan merece reconocemento pa e manera cu nan a representa Aruba.

E torneo ta termina, pero e proceso apenas ta cuminsa.

Aruba tin un grupo di hoben futbolistanan cu por sigui crece y desaroya. Cu preparacion, continuidad y oportunidad, e generacion aki tin tur potencial pa representa nos pais na un nivel ainda mas halt den futuro.

Nos por bisa cu orguyo: esaki ta un di e seleccionnan U14 mas prometedor cu Aruba a presenta.

 Aruba su futbol ta fuerte. E futuro ta prometedor. Awor ta sigui traha pa e proximo campeonato.