Aruba Taekwondo Bond a organisa central training

ORANJESTAD (AAN): Den fin di siman, Aruba Taekwondo Bond (ARTBO) a organisa central training for di 11'or di mainta pa 2'or di atardi na Centro Deportivo Frans Figaroa.

Varios scol di Taekwondo a manda nan atletanan pa asisti na e training aki. Despues di dos aña di e pandemia cos a cuminsa lora bek den Taekwondo di Aruba. ARTBO a organisa campeonato, curso di referee y awo central training. Training tabata bou encargo di Stuart Smit y Monica Pimentel. Ambos a representa Aruba den varios weganan Sur Americano, Pan Americano, Mundial y Olimpico cu varios medaya, bon resultado y amplio experencia. 

ARTBO tin plannan grandi pa Taekwondo di Aruba, mirando tur e actividadnan cu tin den e Ciclo Olimpico 2024/2028. Stuart Smit y Monica Pimentel a splica e atletanan presente den cua direccion nan ta bayendo y kiko ta spera for di nan. Esaki ta e prome training pa cera conoci cu e atletanan, cada biaha lo subi e nivel di training. Stuart Smit y Monica Pimentel a splica cu pa por yega na un bon nivel mester cuminsa den cas pa asina forma atletanan di cadet, junior y adulto.

Edmundo Josiah di COA a presenta na e training y a combersa cu Stuart Smit y Monica Pimentel. Stuart Smit y Monica Pimentel a keda satisfecho cu e cantidad di atletanan cu a presenta na e central training. Otro siman dia 16 di April training lo sigui na Centro Deportivo Frans Figaroa for di 11'or di mainta pa 2'or di atardi.