Aruba Rotary Sluggers a bira campeon di baseball Hubenil

*Un biaha mas hobennan a demostra nan talento

ORANJESTAD(AAN): Diamars anochi den e final di baseball Hubenil Aruba Rotary Sluggers a gana Hammershark Garden Fresh 2-1, pa asina gana e serie di best of 7 4-1 pa titula campeon di Aruba.

Publico presente a disfruta di un tremendo wega preta di baseball, unda cu pa Hammershark e mihor bateadornan tabata Rolando Petronia (3-2) y Marcelino Alvarez (3-1).

Di otro banda mihor bateadornan pa Sluggers tabata Xanron Dijkhoff (3-2), Ayshon Rodriguez (3-1), Yurian Croes (3-1) y Bernini Engelhardt (3-1).

Despues cu e wega a termina, directiva di e campeonato hunto cu e representante di Ministerio di Deporte Rodymar Geerman a haci entrega di e premionan na e campeon y sub campeon di Aruba.

Banda di esaki a haci entrega di e premionan individual pa esnan cu a destaca durante e campeonato.

MVP di baseball Hubenil a resulta di ta Marshall Albertsz y e mesun Albertsz a ricibi tambe e premio pa mihor pitcher.

E premio di mihor bateador a bay pa Keith Brooks, mientras cu e homerun king tabata Rolando Petronia.

Locual a resalta un biaha mas e temporada aki ta cu Aruba di berdad tin un grupo grandi di hungador talentoso di baseball, cu si nan sigui asina sigur lo ta un bon ehempel pa tur e muchanan cu a  caba di cuminza hunga baseball of tin algun aña caba ta practica e deporte.

E speranza sigur ta cu poco poco mas di nos hobennan lo sigui destaca pa asina un dia haya un oportunidad pa yega den Major League, cu ta e soño grandi di hopi mucha riba nos isla.