Aruba a sali pa 6th Caribbean Karate Championship

Evento na Republica Dominicana

ORANJESTAD (AAN): Diadomingo 23 di juli ultimo Aruba Karate Bond (AKB) a biaha pa ciudad Santo Domingo na Republica Dominicana pa participa na e “6th Caribbean Karate Championship 2023”. E delegacion ta consisti di e karatekanan di seleccion, esta Maresha Tromp, Jeshua Mejia, Kyran Tromp y Zillion Brugés. Nan ta acompaña pa e ekipo di coach, esta Alberto Gonzalez Lujan y Juan David Velasquez.

   Campeonato, curso y mas: Hunto cu nan ta biaha tambe e miembronan di e directiva di AKB, esta presidente “sensei” Gustavo Velasquez, vice-presidente “sensei” Felix Tromp y secretaria Merritsza Tromp. E biahe aki tin como meta pa no solamente participa na e campeonato, pero tambe pa cera conoci cu otro directiva deportivo y sigui varios curso, tayer y seminario cu ta worde ofreci pa engrandece e deporta di karate den Caribe. Cu un preparacion hopi intensivo, Maresha Tromp, Jeshua Mejia, Kyran Tromp y Zillion Brugés ta cla pa e campeonato aki cu lo tuma luga na Juan Pablo Duarte Olympic Centre di 24 di juli pa 29 di juli. E campeonato aki ta conta cu participacion di 22 pais y ta cubri e categorianan U12, U14, Cadets, Junior & Senior.

   Gradicimento: Aruba Karate Bond ta desea e atletanan hopi exito. Alavez Aruba Karate Bond ta gradici Comite Olimpico Aruba, Stichting Sportsubsidie Aruba, Lotto pa Deporte, Setar N.V. pa nan contribucion, WEB Aruba N.V. pa e uniform nobo, como tambe tur mayor, tur boluntario y tur persona cu ta apoya AKB pa cu su calendario di actividad 2023.