Aruba a logra seis titulo den campeonato na Ajedrez na India

ORANJESTAD (AAN): Nan a regresa bek cu sonrisa riba nan cara! 

Ta trata aki di e seleccion di Aruba, cu a bay competi na un Campeonato di Ajedrez, y a bin bek cu seis titulo, danki na e esfuerzo di e participantenan cu pa casi 5 aña a traha duro cu training y preparacion.

   E competencianan aki a tuma lugar na India, unda e seriedad pa e wega aki ta di grado hopi halto.

   A compronde cu e horarionan di e Campeonato tabata hopi largo, y pesey mes e tabata dianan largo cu no ta facil.  Aruba a logra di gana e titulo di FIDE Master (conoci como FM), cu ta un di e titulonan oficial cu un hungador di Ajedrez por ricibi di International Chess Federation (FIDE).

   Aruba a gana tambe e titulo di Candidate Master (conoci como CM), cu ta un titulo cu ta duna hungadornan cu  a demostra e potencial di bira Masters den Ajedrez.

   Nan a gana tambe e titulo di Damas, y esaki ta algo cu a haci Annelaine Jacobs hopi orguyoso.

   E team di damas di Aruba a enfrenta 168 pais den e campeonato aki.  E team di cabayeros di Aruba enfrenta 188 pais.  Nan a haci nan best pa tene Aruba su nomber na halto.  DIARIO ta felicita nan cu e logro aki.