Aruba a domina den diferente categoria di Beach Tennis na Bonaire

ORANJESTAD (AAN): E hungadornan di Beach Tennis di Aruba, un biaha mas a demostra nan dominio den e deporte,

door di gana diferente categoria den e prome evento di ABC Beach Tennis Cup, teni pa participantenan di Aruba, Bonaire, y Curaçao na e isla di flamingo.

   E comision di Beach Tennis Bonaire como parti di e Bonaire International Sports Week a organiza e torneo aki cu a core for di 31 di Maart te cu 2 di April, y Aruba a mobiliza cu 22 atleta participando den diferente categoria.

   Maria Buuts y Eugemine Ignacio a gana e categoria Open Women’s (nivel mas halto di wega), mientras cu Wayne Tromp y Jelle Groenendijk a gana e categoria Open Men’s (nivel mas halto di wega).

   Paola Ordoñez y Valery Karsten a gana e categoria Advanced Women’s, mientras cu Joke Hertogen y Jenna El Oualkadi tabata runner-up.  Talentonan hoben Thyshawn Dammers y Sebastian Dominguez a bay cu e categoria Advanced Men’s.

   Marc Kiezebrink di Beach Tennis Aruba a declara: “Nos ta hopi orguyoso di nos hungadornan pa nan logro den ABC Beach Tennis Cup.  Nan exito ta prueba di e trabao duro y dedicacion di tur esnan envolvi den e deporte na Aruba.  Beach Tennis ta birando mas y mas popular rond mundo y na islanan ABC, y nos ta emociona di mira nos hungadornan bay dilanti pa henter islanan ABC.”

   E desaroyo continuo di Beach Tennis ta necesario pa su crecimento y exito.  Aruba ta dedica pa traha den colaboracion cu e islanan bisiña pa organiza mas torneo y eventonan pa sostene y promove e deporte aki.