Alhambra y IBiSA ta cla pa e di 38 edicion di Aruba International Half Marathon

ORANJESTAD(AAN): E aña aki e intencion ta pa e Aruba International Half Marathon logra haya 1000 participante.

Durante un conferencia di prensa Annie Dirks, Marketing manager di Alhambra Casino, a indica cu pa Alhambra un biaha mas ta un honor pa uni su mes cu IBiSA pa yuda e evento bira un exito un biaha mas.

“Semper nos ta gusta yuda diferente fundacion y deporte tambe”, segun Dirks.

Will Erasmus di departamento di comunicacion di IBiSA a trece dilanti cu esaki ta bay ta di 38 edicion di e careda hunto cu Alhambra.

El a gradici e casino pa su aporte di semper y a indica cu a cuminza cu e registracion mas trempan, pa purba logra haya 1000 participante.

“E careda aki ta bay tuma lugar 10 di Maart 2024 y manera semper e ta cuminza na Joe Laveist y ta caba na Alhambra Casino”.

E careda ta cuminza 05:30 y tin un limite di tempo di 3 ora, segun Erasmus.

El a revela e poster di e careda y a bisa cu e slogan e aña aki ta ‘Run in Paradise’, mirando cu di berdad nos isla ta un paraiso.

Segun Erasmus, e intencion ta pa haci e careda bira mas grandi internacionalmente, pues otro aña ta bay purba aumenta e participacion internacional.

E distancia di e careda ta bay ta 21 kilometer.

Ta bay tin diferente categoria, incluyendo e duo relay mientras cu e aña aki ta bay bek na e asina yama Team of Four.

Dimes ta bay tin premionan cash pa e diferente ganadornan tambe.

Director di e careda Francis Tromp a menciona cu registracion a cuminza Diamars mes y por wordo haci na IBiSA Oranjestad di 8’or pa 12’or di merida y di 1’or pa 4’or di atardi.

Entregamento di Bip y t-shirt lo tuma lugar Diasabra dia 9 di Maart na Alhambra Casino.

Ta bay tin un ‘briefing’ tambe pa tur atleta, pero e fecha y ora lo wordo anuncia despues riba e pagina di Facebook di IBiSA y riba e website.

Tromp a splica cu ta bay tin busnan pa transporta e atletanan for di Alhambra pa Joe Laveist.

E busnan ta sali 04:30 y ta bay tin busnan tambe pa e teamnan duo y relay.