Lo ta bon si ATA por tene cuenta cu:
ORANJESTAD (AAN) Diadomingo merdia tabata tin turistanan den e Terminal di Arubus na Playa, posiblemente pasaheronan di e crucero grandi cu por a mira mara na waf y tabata wardando bus pa bay beach.
Nan tabata cuestiona cu e terminal di bus ta hopi mahos, incomodo, y no tin unda pa scapa un tiki di solo, no un tiki sombra pa alivia e calor barbaro cu tin, y cu mirando cuanto turista crucero ta bishita e Isla y e cantidad di nan cu ta bay den e area di beach abordo di Arubus, y cu e prijs pa ticket no ta barata, nan ta haya cu e terminal di Arubus lo mester ta bunita y cu suficiente espacio cu banki, mas den e temporada di calor.
Un pareha Argentino cu ya a bishita Aruba caba, a comenta cu e parada grandi di bus di San Nicolas ta hopi miho cu esaki di Playa. Y tambe e ta haya cu Aruba su ciudad a bira descuida, cu no ta manera añanan atras ora nan a bin pa prome biaha, cu Aruba tabata increiblemente limpi, hasta e ta corda di un campaña cu tabata tin bao e lema “Aruba ta di nos”.
Fuera di e opinion di e turistanan aki, hende cu ta traha den area di hotel a comenta cu practicamente tur e bushaltenan ta hopi sushi, esun dilanti Playa Linda, segun nan a remarca, ta yen di sushi, boter, tayo di carton benta patras, dilanti y na banda di e parada aki, y tur dia ta keda mescos sin cu e companianan di limpieza bin haci’e limpi.
Hasta e ta opina cu mester pone camera den e bushaltenan pa capta ken ta tira sushi, pa busca e persona(nan) y nan haya un bon multa.
