Parlamentario Endy Croes: E wea di steam di AVP ta totando!
ORANJESTAD (AAN): Parlamentario Endy Croes a enfatisa e importancia pa sigui tur desaroyo politico di cerca, unda e bienestar di Aruba semper mester ta e prioridad. Croes a señala cu, desde principio di 2026 tin dos echo clave cu ta marcando e rumbo di e gobernacion actual: e anuncio di Mike Eman cu e lo retira na september proximo pa duna paso na Wendrick Cicilia como lider di AVP, y e decision sorpresivo, sin avisa su Vice Prome Minister Gerlien Croes, pa cambia e puesto di Prome Minister entrante 1 di januari 2027.
Cambio: E ta referi na reorganizacion Interno y e Cambio di Liderazgo den AVP. Segun Parlamentario Croes a remarca, mientras Aruba ta debatiendo temanan di gran importancia nacional manera e HOFA y e desaroyonan petrolero, e cambionan di liderazgo den AVP ta causando hopi tension interno. Segun e parlamentario, e anuncio di retiro di Mike Eman despues di 18 luna na mando ta wordo percibi pa pueblo como un falta di compromiso y un entrega di nos autonomia na Hulanda.
Paden di AVP, e tendencia ta pa Wendrick Cicilia asumi e liderazgo di partido di manera temporal, pero sin tuma e puesto di Prome Minister di biaha pa falta di experiencia. En bes di esaki, e propuesta ta pa Minister Arthur Dowers bira e siguiente Prome Minister entrante 1 di januari 2027, un idea cu Dowers a ricibi cu entusiasmo prome cu e conclui su carera politico. Como parti di e reorganizacion aki, ta propone tambe pa Robert Candelaria tuma e cartera di Husticia over.
Conflicto interno: Segun fuentenan cercano, tabatin discusionnan tenso den e circulo interno di AVP tocante e futuro reparticion di carteranan ministerial. Di un banda, Marlon Sneek ta reclama un posicion den gabinete a base di su lealtad y trayectoria desde 2010, argumentando cu el a carga un gran costo politico pa defende e partido den su momentonan di mas dificil y controversial.
Di otro banda, Croes a tuma nota di e posicion di Parlamentario Heyliger, kende tambe tin e aspiracion pa drenta gabinete. Heyliger a recorda e discusion anterior ora cu "Baba" Herde a wordo nombra como minister sin a participa den e eleccion. Den e momento ey, Heyliger a wordo pidi pa sede su puesto pa mantene e stabilidad di e gobierno, sacrificando e representacion directo di San Nicolas. Croes a enfatisa cu Heyliger a laga sa claramente cu e no lo permiti pa esaki ripiti. Su postura ta cu un persona cu no a bay eleccion, manera Candelaria, no mester pasa su dilanti. Heyliger ta aspira pa asumi e cartera di Husticia of Energia.
Conclusion: Parlamentario Endy Croes a conclui cu e informacionnan di e circulo interno di AVP ta indica cu e tensionnan aki lo sigui escala. El a reitera cu e lo sigui e desaroyonan aki di cerca durante e di dos mita di e aña aki, ya cu e decisionnan aki lo tin un impacto directo riba e futuro politico y di gobernacion di Aruba. E weya ta totando!
