Eduard Pieters di PPA:
ORANJESTAD (AAN): Durante un conferencia di prensa Eduard Pieters, miembro activo di PPA, a comparti su preocupacion tocante e proceso di Rijkswet Financieel Toezicht. Ta di lamenta cu for di luna di januari, fraccion di PPA a entrega un peticion na gobierno pa bin parlamento y splica mas detaya riba henter e contenido di Rijkswet den un reunion publico. Sinembargo te dia di awe no a yama e reunion aki y ta un violacion di e Reglamento di Ordo di Parlamento, unda cu ta poni cu den 30 dia, mester yama un reunion publico.
Presentacion di ‘Contouren’ di Rijkswet
Apenas algun siman atras, Parlamento a haya un presentacion di e ambtenaren, den forma di un schets of mane nan ta yam’e ‘contouren’ di e Ley di Reino pa Supervision Financiero. “Fraccion di PPA ta preocupa ya cu basa riba e informacion ey cu honorabel miembro di parlamento sr. Otmar Oduber a haya, cu na final di september Hulanda lo trata un concepto nobo di Rijkswet basa riba e ‘contouren’ aki,” Eduard a indica.
Parlamento ultimo stacion den e proceso
Ta di lamenta, cu ainda Parlamento no a yama e reunion publico ainda y probecha trata e ‘contouren’ y duna e miembronan di Parlamento, como organo mas halto na Aruba, e oportunidad di duna nan sentimento, aporte y of desaprobacion na e Rijkswet aki. E ora pueblo por huzga pa nan mes con nos representantenan, nos parlamentarionan ta pensa y actua.
Ta un grupo di ambtenaar na Hulanda y Aruba a diseña e contenido di e Rijkswet aki y prome caminda cu e ta bay ta Rijksministerraad na Den Haag. Despues te unda fraccion di PPA ta na altura, ta cu e intencion ta pa september e concepto aki bay Tweede Kamer y finalmente lo yega Aruba pa Parlamento. Ta di compronde e ora, cu den cierto forma ta trapa riba autoridad di Parlamento. A base di e.o. esaki, Pieters ta cuestiona y ta lansa e pregunta clave: “Pregunta ta keda; Parlamento mester ‘dicidi’ riba esaki of ta cuestion di djis bay di acuerdo, paso ya e deal ta cla caba?”
Falta di ta proactivo y pone prioridad
Segun Pieters: “Na final di mei tabatin un deadline caminda e Rijkswet mester tabata na Rijksministerraad y niun decision a cay na Aruba, cu tur su consecuencianan. For di fin di aña pasa por a trata e concepto den Parlamento, pero Aruba tabata den proceso di eleccion Parlamentario y e neglisha e parti aki.” Fraccion di PPA, despues di eleccion na december, mesora na januari 2025 a pidi un reunion publico urgente pa por trata e Rijkswet debidamente den Parlamento. Eduard Pieters ta lamenta: “Si e reunion aki a wordo yama, parlamento por a duna nan ‘gevoelens’ y pueblo por a haya informacion tocante e contenido di e Rijkswet. Y si ainda Aruba tabata kier cierto cambio, por a hacie prome cu e deadline di mei. Sinembargo no a probecha di e oportunidad aki y awo nos mester paga hopi miyon di florin mas na interes na Hulanda.”
