Parlamentario Hendrik Tevreden:
ORANJESTAD (AAN): Parlamentario Hendrik Tevreden di Partido MEP, ta mirando con Gobierno kier presenta rijkswet HOFA manera un ‘paso logico’ despues di acuerdo cu Hulanda. Pero realidad ta cu Parlamento, e organo mas halto cu ta representa pueblo, e voz oficial di pueblo, a worde buta un banda den e proceso.
Den nos sistema constitucional e proceso ta cla: prome ta Parlamento, despues Gobierno di Reino. Aki a pasa pa robes. Gobierno a compromete su mes cu Hulanda prome, y despues a bin duna su Parlamento un copia.
Den esaki, Eman ta manda e señal bon cla cu e tin un stempelparlement. Gobierno kier pa Parlamento bira nada mas cu un stempel cu ta haci y ratifica loke a worde dicidi entre nan. Esaki ta un violacion di nos democracia.
Bestuurlijk akkoord no ta ley: Gobierno ta keda referi constantemente na e Bestuurlijk Akkoord di juni 2024. Pero un firma den nomber di ex-prome minister no por reemplasa mandato di pueblo. Bestuurlijk akkoord no ta riba ley! Solamente Parlamento por dicidi si un rijkswet ta hustifica of ta deseo di pueblo of no. Pues niun acuerdo entre Gobiernonan por forsa un Parlamentario vota PRO.
Na april 2024, RAft a worde baha for di mesa. Pueblo a hala rosea di trankilidad y alegria pasobra un peso pisa di Den Haag a baha for di su lomba. Awor, un aña despues, HOFA ta subi riba mesa: un nomber nobo, pero mes esencia, supervision structural di Hulanda riba Aruba su finansa. Metemento pa torno na bo autonomia.
Peligro di HOFA: E tin su peligronan den diferente categoria. (*) E peligro Institucional: E ta pasa riba Trias Politica y trata Parlamento manera stempel. (*) E peligro Politico: E ta limita e libertad di Gobierno di Aruba. Y ta crea un relacion di dependencia riba Den Haag. (*) E peligro Democratico: Pueblo no a worde scucha y Parlamento a worde consulta despues cu e a concepto ya a worde aproba y entrega. (*) E peligro Huridico: Un consensusrijkswet por existi solamente cu aprobacion di Parlamento. Pero awor Parlamento a keda como espectador.
Un rotundo NO: HOFA no ta solamente un cuestion tecnico. Ta un menaza pa nos futuro. Aruba no mester sigui acepta acuerdo cu ta kita rol di Parlamento. “Sin aprobacion di Parlamento, no tin consensusrijkswet. E ‘no’ mester cla.” E ley HOFA no ta un aspecto solamente tecnico. E ta un menaza real riba nos autonomia y un paso back atras pa nos libertad democratico financiero. Parlamento no por dobla bou di presion di acuerdo entre Gobiernonan. Parlamento no ta atene su mes na e mandato di Gobierno, sino e mandato di pueblo. Aruba tin di sinti cu tin un Parlamento cu ta defende su autonomia. Nos no por acepta cu via porta patras Hulanda ta tuma grip riba nos finansa y maneho. Nos tin di duna e señal cu solamente atraves di e caminda legal leynan ta worde aproba sin mas.
Parlamento no mester entretene HOFA of puntra kico pa cambia riba dje. E contesta tin di ta cla y raspa: NO!
