Lider di MEP, Evelyn Wever-Croes:
Durante conferencia regional di COPPPAL,
ORANJESTAD (AAN): Durante conferencia di prensa di Fraccion di MEP den Parlamento, Lider di MEP, Evelyn Wever-Croes a elabora riba e conferencia regional exitoso di COPPPAL cu a tuma luga e fin di siman cu a pasa. COPPPAL ta un organisacion politico prestigioso di Latino America di cual Partido MEP ta miembro desde añanan 80. Partido MEP e aña aki tawata anfitrion di e conferencia importante aki cu a tuma luga na Cede di MEP na Sta.Cruz y tawata tin participacion di Republica Dominicana, Argentina, Puerto Rico, Mexico, Boneiro y Corsou y Aruba. E tema di e conferencia tawata decolonisacion y colonisacion.
Lider di MEP a remarca cu e cosnan aki, aunke ta parce cosnan di pasado, te ainda ta pasando. Un ehempel cu el a duna di esaki, ta e Rijkswet HOFA. Partido MEP ta di pensamento cu HOFA ta un intento pa recolonisa nos pais pasobra e ta kita autoridad di nos pais.
Den nomber di Aruba, Lider di MEP a agrega, cu el a trece e preocupacionnan cu tin pa cu e Rijkswet HOFA y a haya sosten. Y durante e reunion plenaria, cu ta e asemblea general cu lo tuma luga na november proximo, e caso di Aruba lo wordo treci dilanti. “Cu esaki nos lucha contra e Rijkswet HOFA ta cuminsa riba nivel internacional y no solamente aki na Aruba”. Lider di MEP a enfatisa.
Wever-Croes, den e conferencia a trece dilanti tambe e caso di Boneiro, Sint Eustacius y Saba, (Islanan BES), mencionando cu esakinan ta islanan cu ta pasando den momentonan hopi dificil. Durante e bishita siman pasa den Parlamento di e delegacionnan di Eilandsraad y diputadonan di e tres islanan aki, nan a duna splicacion amplio di loke cu ta pasando na e islanan, cu Hulanda no ta consultando cu nan, con Hulanda kier cambia un ley importante, WolBES y FinBES, unilateralmente sin consulta cu e islanan.
E unico manera cu e representantenan di Boneiro, Saba y Sint Eustatius por reaciona, ta via di internet consultaties. Asina, Lider di MEP a enfatisa, no por trata cu islanan den Reino. COPPPAL di su banda a duna su palabra cu nan lo trata e caso aki riba nivel internacional.
