Parlamentario John Hart di AVP:
ORANJESTAD (AAN): Parlamentario Hart a remarca durante un entrevista na Hulanda cu fraccion di AVP te kere den e balor agrega di un bon relacion strategico cu Hulanda. Reunionnan den e Plataforma di IPKO ta sumamente importante pa intercambia di pensamento cu otro, pero tambe pa tin e sentimento di kico ta bibando den Reino Hulandes for di e perspectiva di politiconan.
Hart ta di opinion cu ta importante pa fortalece e relacion den Reino cu Hulanda, pero ta kere fuertemente tambe cu e relacion aki por para firma solamente ora cu tin un ambiente di respet mutuo.
“Durante reunionnan di commision na IPKO, den combersacion cu diferente politico Hulandes di Eerste Kamer y Tweede Kamer mi a comunica un parti esencial di nos como pais cual ta: chikito y simpel nos por ta, pero si respeta.”
Esaki mi a enfatisa den e contexto cu aunke Aruba ta califica como un Estado Chikito den Desaroyo (SIDS) y ta vulnerable pa cambio di clima (tormentanan), dependencia economico riba turismo y diversificacion economico limita; semper pais Aruba a sa di ta chikito y respeta den Reino.
Nos a sa di sobrepasa retonan y ta importante pa Hulanda ta na altura di nos aspiracion cu nos tin pa hisa calidad di bida pa nos ciudadanonan, pa conecta e cifranan economico na e bienestar general, na e bon comun.
P’esey awe bo ta wak back renobacion di bario, aumento di reparatietoeslag pa nos grandinan, renobacion di centro di ciudad, mehoracion di poder di compras y bo ta wak back tambe un minister president cu ta busca e conexion cu Hulanda.
Locual cu sigur mester tene na cuenta y esaki a resalta durante e prome dia di IPKO na Den Haag den e sala di Eerste Kamer ta cu politiek Den Haag den e ultimo añanan ta instabiel. Na momento di un conflicto lo bo descubri con bon e relacion ta di berdad. Esaki ta conta tambe pa conflictonan den Reino. E ta un echo cu paisnan den Caribe como parti di Reino Hulandes ta vulnerabel ora ta trata conflictonan geopolitico.
E preocupacion aki a worde enfatisa na IPKO Den Haag. Constitucion ta subordina na Statuut di Reino Hulandes, cu ta regla relacion estatal entre e paisnan miembro. Den Statuut ta para cu e paisnan en cuestion ta atende nan propio asuntonan independientemente y cu conhuntamente nan ta atende asuntonan di Reino. Sigur den caso di un conflicto entre Merca cu Venezuela, nos como pais den Reino ta dependiente di Hulanda pa loke ta trata defensa y relacionnan internacional.
Durante IPKO Aruba, Curaçao y Sint Maarten a haci un peticion concreto pa mas comunicacion pro activo entre Hulanda y islanan pa loke ta trata asuntonan di defensa riba e geopolítica; den especifico e situacion entre Venezuela y Merca pa cu defensa di e islanan den Caribe.
Parlamentario Hart ta enfatisa cu, teniendo na cuenta e desaroyo geopolitico, ta importante pa Gobierno di Aruba, pero tambe Parlamento di Aruba, keda den comunicacion cu Reino Hulandes. Parlamentario Hart lo keda vigila e desaroyonan y lo tene Gobierno di Aruba skerpi pa keda den comunicacion cu Parlamento di Aruba tocante e desaroyonan geopolitico.
