ORANJESTAD (AAN): Presidente di Parlamento Marlon Sneek recientemente a duna un relato di algun reunion cu lo tuma luga otro siman den Parlamento.
E prome lo tuma luga dialuna dia 13 di april, na unda cu Minister Arthur Dowers lo ta den Parlamento riba e topico AWSS. E situacion actual y e desaroyonan cu ta andando.
Lo hiba debate tambe riba e situacion di Parkietenbos na unda cu tin hopi keho di e bario cu ta mal contento cu e holor basta desagradabel di desechonan humano. Tambe lo duna cuenta riba e situacion y casonan den corte cu hotelnan a entama contra Gobierno pa motibo di mal holor den nan area.
Diamars dia 14, Secretario di Estado di Reino Eric van der Burg lo ta den Parlamento pa 9 or di mainta, na unda Parlamento lo hiba dialogo riba diferente topico, entre otro e ley di Reino Hofa. Tambe Parlamento lo tin riba e diamars aki un presidium pa debati riba e temanan di agenda pa e siguiente IPKO cu lo tuma luga na juli proximo na Hulanda.
Riba diahuebs 16, Minister di Husticia Arthur Dowers lo ta un biaha mas den Parlamento riba e tema di e refineria despues di e desaroyonan cu a tuma luga na Venezuela y mirando cu gobierno di Merca a informa cu nan kier yuda Venezuela pa nan yega na optimalisacion y produccion mas halto.
Fraccion di MEP a entrega un motion na unda cu ta pidi pa Gobierno haci su maximo esfuerso pa wak kico por haci cu e refineria, sea habrie bek of uz’e pa almacenahe basa riba esaki. Minister Dowers lo duna un update riba e desaroyonan cu a tuma luga durante e periodo ey te cu awo y riba e posibilidadnan pa cu refineria.
E siguiente reunion den Parlamento lo ta diabierna 17 pa 9 or di mainta pa un kennismaking cu Minister Plenipotenciario na Hulanda, señora Milly Schwengle.
E reunionnan aki den Parlamento ta mustra cu Aruba ta enfrentando varios reto importante, manera AWSS, e problema di holor na Parkietenbos y futuro di refineria. E debatenan lo ta clave pa busca solucionnan concreto cu por mehora calidad di bida y duna direccion pa desaroyo sostenibel.
