Eduard Pieters:
ORANJESTAD (AAN): Riba 14 di juli 2025, un biaha mas un desaroyo significativo a tuma lugar den Reino di Hulandes, unda a firma bek e acuerdo di cooperacion entre Aruba, Corsou y Boneiro pa fortalece e idioma Papiamento den educacion.
Minister Gerlien Croes, hunto cu Minister Sithree van Heydoorn di Corsou y Diputado Nina den Heyer di Boneiro a firma un acuerdo, cu ta pone Papiamento na centro di nos desaroyo di enseñansa.
Fraccion di PPA, mediante su miembro activo, Eduard Pieters, ta expresa su gran apoyo y orguyo cu e paso concreto aki entre e islanan ABC. PPA: Un Partido cu ta promove Papiamento Eduard Pieters kier enfatisa cu den e programa di partido di PPA, tabatin bon cla poni: “PPA ta promove pa Papiamento bira idioma di instruccion den enseñansa primario y pa haya su luga legitimo den e.o. nos sistema di enseñansa.”
PPA ta kere cu e idioma materno di mayoria hende na Aruba ta un pilar fundamental pa formacion di nos muchanan y hobennan y pa fortalece e identidad cultural. Basa riba e pensamento aki, PPA ta duna sosten total na e colaboracion recien firma. Un cooperacion renoba pa alinea metodo y eleva nivel E acuerdo di juli 2025 ta sirbi como continuacion di un acuerdo mas anterior (firma na 2018), pero den un bachi mas nobo y cu ambicion renoba.
E colaboracion ta enfoca riba investigacion, maneho di idioma, desaroyo di metodo y materialnan na papiamento y iniciativanan cultural cu ta envolvi Papiamento . “Aruba a conoce cambionan den loke ta materianan di idioma y metodo, cu ta uza den scol primario.
Papiamento ya ta introduci como materia pa siña lesa y skirbi den klas 1. PPA ta convenci cu e union den Reino Hulandes y e necesidad pa alinea e esfuerzo aki sigur ta uno di aplaudi y netamente e echo aki ta sirbi pa realisa e vision cu PPA tin.” Eduard a expresa. Educacion den Papiamento: un herment poderoso.
A pesar cu ainda tin hende ta pensa cu Papiamento como idioma ta algo no beneficioso pa nos muchanan, enseñansa den idioma materno ta crucial pa un ambiente educativo exitoso y esey ta netamente loke PPA a enfatisa tambe den su programa di partido. Investigacion cientifico rond mundo di e.o. UNESCO ta mustra, cu un mucha ta siña mihor den su propio idioma, ta desaroya pensamento critico, ta fomenta autoestima y ta logra mihor resultado escolar. World bank tambe ta enfatisa pa uza idioma materno den enseñansa pa e.o. combati pobresa.
Clausura: Papiamento ta nos futuro comun PPA sigur lo sigui di cerca henter e desaroyo di e acuerdo firma aki y cu e pasonan concreto tuma lugar pa realisa e vision di PPA. “Ta un orguyo pa mira loke PPA semper ta boga p’e, cu ta e union di e islanan ABC y con nan kier defende y desaroya Papiamento. E idioma aki ta nos herencia, nos presente y nos futuro. Cu accion concreto manera e acuerdo firma, Aruba ta manda un señal cla: nos ta pone balor riba nos idioma y nos pueblo”, Eduard a finalisa bisando.
Fraccion di PPA ta compromete pa sigui traha den Parlamento pa protega, promove y integra Papiamento den tur nivel. Paso pa paso, nos ta uni nos hendenan, haci nos pueblo mas fuerte, den su identidad y su conocemento.
