Parlamentario Eduard Pieters:
ORANJESTAD (AAN): Futuro di San Nicolas no por sigui depende di e promesanan politico, e proyectonan temporal of e plannan cu ta desaparece cada biaha cu Gobierno cambia. E districto mester un vision nacional, cu por sobrevivi eleccion y periodo di gobernacion.
Esey ta un di e mensahenan principal cu lider di fraccion di PPA, Eduard Pieters, a destaca despues di un encuentro cu Suzette Dumfries, kende a presenta su investigacion, resultado y vision tocante nation building y futuro di San Nicolas. Tambe presente tabata Rigoberto St. Jago candidato di PPA, kende a pone enfasis riba e potencial cultural extraordinario cu San Nicolas tin.
Pieters a califica e presentacion como uno sumamente balioso y interesante, particularmente pasobra e ta ratifica e vision di PPA pa San Nicolas ta un Ciudad di Herencia Cultural. Vision cu PPA tin den su Plan Nos Aruba 2050. Ademas e ta conecta desaroyo economico cu algo cu mester haya hopi mas peso den politica: desaroyo humano, identidad, infrastrucura social y construccion di un nacion.
Suzette Dumfries: un plan nacional, no un proyecto partidario
Durante su presentacion, Suzette Dumfries a comparti resultado di su investigacion cu anteriormente a wordo presenta durante e foro Future San Nicolas. E investigacion ta forma e base pa un vision mas amplio, cu el a describi como un plan cu mester ta carga no door di un solo partido, sino door di Aruba.
Dumfries a indica cu e encuentro cu PPA ta solamente un prome paso. Su intencion ta pa sigui presenta e vision na e otro fraccionnan, institutonan y entidadnan.
E punto central ta continuidad: Aruba ta creando un futuro cu hopi di e personanan cu ta tumando decision awe, posiblemente no lo forma parti di dje. P’esey, e decisionnan di awe mester ta basa riba informacion, investigacion y un perspectiva cu ta mira mas leu cu un ciclo politico. Pieters a sostene e acercamento aki y a invita habiertamente otro partido, institucion gubernamental y no gubernamental pa scucha e propuesta y participa activamente. Un plan pa San Nicolas no mester ta propiedad di PPA, AVP, MEP of ningun otro partido. E mester ta di Aruba.
Rigoberto St. Jago: San Nicolas tin algo cu mundo no tin
Rigoberto St. Jago a agrega un dimension importante na e discusion: identidad multicultural di San Nicolas. El a destaca con e generacionnan di diferente nacionalidad a trece nan musica, instrumento, tradicion y cultura San Nicolas, creando un mezcla cu awe ta parti di e identidad unico di e distrito. Pa St. Jago, precisamente ey tin un potencial enorme.
San Nicolas no mester trata di copia otro zona turistico. E por desaroya un producto propio, basa riba su historia, diversidad, cultura y autenticidad. E rikesa cultural ey por bira un motor pa un otro tipo di turismo y desaroyo economico.
Pieters: enseñansa tambe ta nation building
Pa Pieters, sinembargo, nation building no por limita su mes na turismo, economia of infrastructura.
Educacion tin un rol fundamental. E institucionnan educativo mester yuda e muchanan y e hobennan conoce, honra y salvaguardia nan identidad, historia y cultura. Segun Pieters, un pais cu no prepara su siguiente generacion pa compronde ken nan ta, ta perde un parti esencial di su capacidad pa construi futuro. P’esey e ta pone infrastructura social y desaroyo humano banda di desaroyo economico cu mester cana den un forma integral cu otro.
San Nicolas mester un vision cu sobrevivi politica
E punto cu ta conecta e mensahenan di Pieters, Dumfries y St. Jago ta precisamente continuidad. San Nicolas a conoce demasiado plan y promesa cu a perde impulso, ora prioridad politico cambia. E reto awor ta pa crea suficiente consenso entre comunidad, politica, comercio y e institucionnan pa e futuro di e districto no depende di ken ta gobernando.
“Nos tin e privilegio awe di tuma e decisionnan cu lo crea e futuro,” Pieters a enfatisa.
Pa PPA, e discusion p’esey ta mas grandi cu revitalisacion di un districto. Ta un discusion tocante ki clase di Aruba e generacion actual kier laga atras. San Nicolas no mester otro promesa cu ta dura te proximo Gobierno. E mester un vision nacional, cu ningun cambio politico por mand’e bek den lachi.
{gallery}PPA ta pone identidad, continuidad y desaroyo humano central den futuro di San Nicolas{/gallery}
