Segun Parlamentario Fraccion di AVP Mike de Meza:
ORANJESTAD (AAN): Segun Parlamentario di Fraccion di AVP Mike de Meza, Parlamento tin hopi traobu pa haci pa trece solucion riba e situacion di desperdicio na Aruba. Entre otro, e ta menciona cu mester sinta cu Serlimar como e compania estatal y tin e parti mas grandi pa recoge sushi den e parti residencial. Tambe lo mester yama Gobierno pa mira kico ta e buraconan den ley riba specialmente tira sushi den mondi y tambe den barionan. Con pa atende y cua sistema por implementa ora gara ciudadanonan ta tira sushi den luganan publico.
Y tambe e ta enfatisa, mester bin cu un metodo di boet pisa pa forsa ciudadanonan pa ta mas cauteloso pa no tira sushi scondi den terenonan prohibi. Ciudadanonan mester sinti cu e placa cu nan lo paga na boet ta mucho mas halto cu e placa cu nan ta paga pa un baki di sushi na cas of pa paga un hende hiba e sushi y deposita esaki den e bakinan cu awo ta gratis.
Segun e, e tarifa di container tambe ta mucho halto y hopi ciudadano no por paga esaki. E prijs a subi drasticamente den e ultimo añanan. Specialmente si mescla e desperdicio den un solo baki, e ta bira mas caro. Esaki ta di comprende tambe, segun e parlamentario, pasobra tratamento di desperdicio a bira algo caro. “Pero toch e mester keda algo accesibel pa e pueblo cu dado momento ta prefera di paga un 50 florin na otro hende pa benta e sushi den mondi. Esaki ta un lastima y nos tin pa soluciona e problema aki”, el a enfatisa.
