A cumpli aki cu menos cu 26 porciento
- Hasta apenas 63% di contestanan di AVP-Futuro so a wordo contesta
ORANJESTAD (AAN): Dialuna mainta durante un reunion den Parlamento, Parlamentario Evelyn Wever-Croes a hiba su disertacion elaborando riba e relato annual 2024-2025 di Parlamento. El a indica cu transparencia y responsabilidad ta e base di un democracia saludabel, pero sin contestacion di gobierno riba preguntanan haci, no tin control.
E relato ta mustra cu Parlamento a haci 2,275 pregunta, pero solamente 585 a worde contesta. Esaki ta menos cu 26%, pa un total di 1.684 pregunta cu no a worde contesta. Esaki ta nifica cu representantenan di pueblo no por cumpli cu nan tareanan completo.
Preguntanan AVP-Futuro: Pa loke ta preguntanan haci pa AVP/Futuro por bisa cu di e preguntanan solamente 63% a worde contesta. Esaki ta un berguensa, y ta di spera cu e parlamentarionan di AVP y Futuro cuminsa pone mas presion riba gobierno pa nan cumpli cu nan tarea.
Preguntanan di MEP: Pa Fraccion di MEP tin 76% di preguntanan sin haya contesta. Esaki no ta solamente un cifra, pero ta un cuestion di respet pa Parlamento y pa pueblo cu nan ta representa. Miembronan di Staten ta dedica tempo y energia pa prepara preguntanan cu tin relacion directo cu problema y preocupacionnan di sociedad. Ora gobierno no ta contesta, esaki ta basicamente un falta di respet na tur ciudadano.
Parlamentario Wever-Croes a expresa cu bon gobernacion no ta solamente un palabra bunita, pero mester ta principalmente un acto concreto di transparencia y dialogo. E tendencia aki ta mina e confianza di pueblo den gobierno y Parlamento.
Di e relato tambe por mira tur e reunionnan cu fraccion di MEP a pidi pa mas di 5 luna pasa, pero ainda Presidente di Parlamento no a yamanan.
Algun di reunionnan tabata riba topico: Algun di e reunionnan teni tabata riba e topico di: (*) Aumento di tarifa di gas domestico. (*) Proceso di plannan di reforma den e “landspakket”. (*) Acusacionnan falso di Minister Gerlien Croes di 14 miyon Florin cu lo a desaparece. (*) Reunion pa Prome Minister bin duna informacion di e proceso di screening di candidato pa minister. (*) Informacion di e lista di remedi cu e gobierno aki a amplia. (*) Negosacionnan cu Hulanda, cu a conduci na entrega di nos autonomia.
E cifra akinan no ta solamente estadistica sino ta trata di preguntanan crucial riba temanan serio cu ta biba den comunidad. Sin informacion pueblo ta keda sin claridad y sin transparencia.
Na final parlamentario Wever-Croes a termina cu un mensahe di speranza. “Nos pueblo a mustra hopi biaha cu e ta merece miho. Den ultimo siete aña y mei bou Gabinete Wever-Croes, Aruba a conoce bon gobernacion, esaki ta loke cu pueblo ta desea, y cu pueblo tin derecho di exigi. Mi tin e fe y confianza cu nos pueblo tin forsa, tin balentia, y tin speranza pa sigui lucha pa un gobierno cu ta habri nan porta pa oportunidadnan, cu ta respeta Parlamento, y cu ta pone pueblo na prome luga di berdad” Parlamentario Wever-Croes a termina bisando.
