Como parti di Fraccion di AVP:
ORANJESTAD (AAN) Jonathan Hart, Parlamentario nobo di Fraccion di AVP, den entrevista cu Matutino DIARIO a expresa cu e oportunidad aki ta un honor hopi grandi y un privilegio, pa sirbi pueblo for di Parlamento.
El a elabora tocante su perspectiva pero no sin antes gradici Dios pa e privilegio di por tin e rol aki y cu durante e Huramentacion dilanti señor Gobernador, Alfonso Boekhoudt, el a duna nan un par di bon conseho. Inmediatamente despues di e huramentacion el a sigui pa e “Fractie Kamer”, unda tabata tin un reunion, pa mesora sigui cu Tratamento di Presupuesto, pa cuminza di biaha cu e trabaonan.
“Aruba tin retonan grandi, y nos tey awo pa duna e perspectiva nobo den Parlamento. Nos tin un fraccion bon balansa aworaki, falta un colega mas pa drenta, pero poco, poco nos ta sintiendo caba e cambio den Parlamento.
Un di e puntonan mas importante ta pa nos eleva e nivel di debate den Parlamento, y naturalmente tin diferente area cu nos tin cu bay enfoca riba dje. Nos a papia caba un tiki riba e poder di compra, di infrastructura, biniendo akinan bo ta wak muchanan di scol para cant’i caminda gewoon pa subi bus, no tin un infrastructura drechi pa bo por para, loke ta hopi peligroso. Tipo di cosnan asin’aki mi ta kere, nos mester ta un tiki mas conciente di dje”, Parlamentario Hart a subraya.
El a expresa cu pueblo di Aruba mester wordo bon sirbi como pagador di belasting. P’esey mester wak bek riba e tipo di infrastructura, enseñanza, salubridad, etc.
Ademas, el a referi na famia como un pilar hopi special di e sociedad. “Famia ta e cornerstone di un sociedad, y mi ta kere cu ta masha importante pa por lanta nos famianan, nos yiunan, pa nan por ta participe di e sociedad, y mi tabata desea pa mi yiunan por a wak e momento aki. Mi a yega di bisa nan cu un dia mi lo bay Den Parlamento, y bo ta papia esey den FE y ta bon pa nan experiencia cu ora bo tin FE e ta algo cu lo tuma lugar tambe”, Parlamentario Jonathan Hart a señala.
