“Pena la bida bo bende nos autonomia”
ORANJESTAD (AAN): Den e conferencia di prensa semanal di Fraccion di MEP dialuna mainta, Parlamentario Evelyn Wever-Croes a manda un aviso pa Gobierno AVP Futuro, en particular Prome Minister Mike Eman, Minister Geoffrey Wever y Minister Gerlien Croes.
El a menciona cu ta un aña pasa, den mes un temporada unda Parlamento tabata den receso den periodo di vakantie di scol, e tres ministernan en cuestion a dicidi di sigui negocia cu Hulanda tras di lomba di Parlamento y tras di lomba di pueblo. Segun e parlamentario, manera cu e periodo di receso y vakantie a caba, e ministernan a presenta e puñal den lomba di nos pueblo, cu tabata e HOFA cu e gobierno AVP Futuro a aproba dia 28 di augustus 2025.
“Nos kier avisa Eman, Wever y Croes, pa no hinca den nan cabes pa haci mescos e aña aki. Na e momentonan aki nos sa cu tin negosacionnan andando. Hasta a lesa den prensa cu nan a cera un acuerdo entre Aruba cu Hulanda kico ta bay cambia. Pena la bida bo bende nos autonomia”, e parlamentario a enfatisa.
Parlamentario Wever-Croes a duna di conoce cu Fraccion di MEP a manda e conseho di profesornan Elzinga y Broeksteeg pa Gobierno di Aruba pa asina nan tene cuenta cu e consehonan aki cu ta critico riba e conseho di Raad van State.
Segun e, Gobierno no mester cambia solamente loke Raad van Advies y Raad van State ta bisa den nan conseho. Gobierno mester tene cuenta cu tur e preocupacionnan cu pueblo di Aruba a trece dilanti. Gobierno mester tene cuenta cu loke Parlamento a trece dilanti, cu e consehonan di e profesornan Hulandes y otro profesornan local y internacional, y tambe cu loke sindicato y gremionan a trece dilanti.
“Uza e consehonan di Raad van Advies, di Raad van State, y di e profesornan Hulandes como bo aliado y yega na mesa cu Hulanda y indica na nan cu e consehonan aki ta mustra cu Aruba no por sigui den e direccion aki, nos tin cu cambia rumbo”, e parlamentario a subraya.
El a expresa cu si Hulanda kier duna interes mas abou, Aruba tambe kier esey. Pero e condicionnan cu Hulanda ta impone no por pasobra nan ta contra nos constitucion y ta un trampa di cua si nos cay aden nos lo no sali afo nunca mas, entre otro.
“Den e temporada aki cu gobierno ta negocia den scondi y den tur secrecia, tene cuenta cu tin e cuadro di Parlamento cu a duna un mocion dentro di cua mester negocia y keda den dje”, el a remarca.
E parlamentario ta termina mandando un advertencia pa Gobierno AVP Futuro. “Mi kier adverti Gobierno pa no hunga e wega di aña pasa un biaha mas pero pa duna claridad. Gobierno a priminti cu e lo bin Parlamento prome cu tuma cualkier decision y nos ta warda nan den Parlamento pa esaki”, Parlamentario Wever-Croes a enfatisa.
