Eduard Pieters di fraccion PPA:
ORANJESTAD (AAN) – Eduard Pieters, di fraccion di Partido PPA, tambe ta elabora tocante e tema di Rijkswet, den conferencia di prensa, unda na prome lugar el a señala, cu no ta mira motibo cu Aruba mester di un consensus Rijkswet na e momentonan aki.
El a referi na Curacao cu a haya e Ley di Reino aki, e supervision financiero, e “schuldsanering”, y toch den diez aña nan debe externo a crece, y esaki cu supervision.
“Banda di esey tambe Curacao tambe tabata tin un presupuesto cu no tabata conta cu surplus. Laga nos corda bon, cu un rijkswet ta pa mehora finanzas publico, pa e placa por wordo gasta debidamente, ‘oveheidsschuld’ a subi di 28% di e GDP di e pais na 54%, y esaki ta den e rapport di Raad van Staten mes, nos a haya e informacion aki, cu ta di Hulanda”, señor Pieters a señala.
El a agrega cu otro aspecto mas grave ta, cu ora nan ta pensa cu ta bay tin un bon supervision, cu nan ta bay tin un bon maneho financiero, un bon crecemento economico, kico a pasa? Cu no tabata tin crecemento economico tampoco!
“Como un meneer di scol bo ta haci bo investigacion, anto e ora ey mi ta puntra mi mes, pakico Aruba den e situacion cu nos ta aworaki nos mester di un consensus rijkswet?” señor Eduard Pieters ta puntra.
El a agrega cu banda di full e proceso cu a bay robes, banda di loke señor Otmar Oduber a papia, e punto ta cu segun cifra, segun datonan, esaki no a yuda nos Isla ruman Curacao, y Sint Maarten no ta mucho leu tampoco.
“Y ami ta trece otro punto dilanti. “Ora cu Aruba a haya su Status Aparte na aña 86, Aruba a pidi un ‘consessie lening’ pa yuda nos crece como pais. Aruba a haya e lening aki na un interes hopi abao, segun mi na 2.5%, y Aruba a sa di paga esaki cabalmente. Kiermen, Hulanda tin experiencia di Aruba, cu e ta un bon pagado!” señor Eduard Pieters a remarca.
El a conclui bisando cu mirando loke Curacao a pasa den dje, no ta mira e motibo cu Aruba mester tin un rijkswet y mirando cu Aruba su finanzas ta stabil. “Den e caso aki e pregunta magico ta: Kico ta e motibo di manda e Rijkswet di HOFA den pura pa Rijksminister Raad?”
