Den Parlamento Mike Eman y Gerlien Croes ta contradeci otro
ORANJESTAD (AAN): Siman pasa Parlamento a haya informacion di Gobierno riba negociacionnan cu Hulanda riba e fiansa di Covid. E reunion tabata uno informativo, na unda por conclui cu negociacionnan ainda ta andando, cu nan ta bayendo bon y cu e gobierno nobo ta hopi satisfecho cu e trabou di e team negociador, cu ta e mesun team cu Gabinete Wever-Croes II a institui.
Negociacionnan ta den un fase bastante avansa, y gobierno ta spera cu pronto por informa Parlamento di e resultadonan. De facto, ta e mesun idioma di ex Minister President Evelyn Wever-Croes.
Loke a resalta ta cu mientras Minister President Mike Eman y Minister di Finansas Geoffrey Wever a elogia e trabounan haci den pasado, Minister Gerlien Croes tabata tin un actitud hopi diferente. E tabata hopi arogante y frustra. E si a ataca Gabinete Wever-Croes basando su mes riba diferente acusacionnan eroneo. El a presenta un “timeline” di corespondencia di e negociacionnan cu segun e ta esun corecto, pero di apenas 5 carta, siendo cu den henter e proceso tabata tin centenares di carta. Unico cos cu Minister Gerlien Croes kier a haci ta saca su gal.
“Minister Croes no a trece nada di balor agrega dilanti. E kier bagatelisa e pandemia cu a haci hopi hende dolor. Mi ta lamenta si pasobra mi ta kere den liderazgo femenino, pero e forma cu e a presenta, sigur compara cu e dos otro ministernan, ta mahos” ex Minister President Evelyn Wever-Croes a duna di conoce.
Den nomber di Parlamento el a pidi e Prome Minister pa tene Parlamento informa riba base regular pasobra tur e negociacionnan ta basa riba e condicionnan cu Parlamento a pone desde aña 2000. Algo cu e Minister President actual a bisa di lo hasi.
