Parlamentario Xiomara Maduro:
ORANJESTAD (AAN): Transparencia financiero y control parlamentario ta forma e base di un gobernacion responsabel. Sin informacion actualisa y sin aprobacion di cambionan presupuestario na tempo, Parlamento no por eherce su funcion di control y pueblo di Aruba no por haya claridad tocante con ta administra su placa. Pa e motibo ey, Parlamentario Xiomara Maduro ta cuestiona e manera cu Gobierno AVP–Futuro ta maneha su responsabilidad financiero y ta duna cuenta na Parlamento di Aruba.
“October ta bay caba y ainda Parlamento no a aproba ni e prome Cambio di Presupuesto di 2026. Esaki ta un paso atras den transparencia y control parlamentario”, Maduro ta declara.
Maneho y Control Continuo: Maduro ta recorda cu desde 2023, durante su gestion como Minister di Finansa, a introduci e practica di presenta cambionan di presupuesto na Parlamento na comienso di aña. Banda di esaki, meymey di aña tabata duna un update financiero y na fin di aña tabata presenta e Cambionan di Fin di Aña. E sistema aki tabata brinda Parlamento e oportunidad pa sigui e desaroyonan financiero durante henter aña, en bes di solamente evalua e situacion despues cu e decisionnan ya a wordo tuma.
“E meta tabata pa Parlamento haya informacion financiero actualisa, pa por evalua e desaroyonan y aproba cambionan necesario. Asina nos tabata percura pa Presupuesto di Pais Aruba ta mas realistico posibel.”
Un presupuesto no ta un documento cu Gobierno por aproba y despues laga den un lachi. Durante aña, entrada y gasto di Gobierno por cambia como resultado di desaroyonan economico, decisionnan politico y necesidadnan inespera. P’esey, ta esencial pa Parlamento haya e informacionnan necesario na tempo pa controla si e gastonan ta cuadra cu e entrada real y si Gobierno ta respetando e prioridadnan aproba.
“Parlamento no por eherce su funcion di control debidamente si Gobierno no ta bin na tempo cu e informacion y e cambionan presupuestario necesario.”lo Merece Claridad
E falta di claridad ta lanta pregunta importante tocante e situacion financiero di Pais Aruba. Maduro ta cuestiona pakico Gobierno AVP–FUTURO no a mantene e practica di rendicion di cuenta periodico, y di con Parlamento ainda no a haya oportunidad pa evalua y aproba esakinan.
“Transparencia financiero no ta un slogan. Ta un obligacion di bon gobernacion. Parlamento mester por controla con Gobierno ta administra placa di pueblo.”
Maduro ta haci un yamada na Minister di Finansa, Geoffrey Wever, pa duna claridad riba e retraso. Pueblo tin derecho di sa con su placa ta wordo gasta y si e decisionnan financiero ta wordo tuma di acuerdo cu e prioridadnan aproba.
“Nos mester fortalece control parlamentario, no debilit’e. Despues di e progreso cu nos a logra desde 2023, ta lamentable pa mira cu AVP–FUTURO ta duna un paso atras. Pueblo di Aruba merece transparencia, responsabilidad y claridad tocante su finansa publico. Rendicion di cuenta no ta un fabor na Parlamento ni na pueblo; ta un deber fundamental di cada Gobierno.”
