Awor Partido AVP ta convenci
ORANJESTAD (AAN): Fraccion AVP ta mustra su gran preocupacion riba e manera oportunista cu cual Partido MEP ta keda maneha un asunto serio manera ta e Rijkswet.
Awo e propio oposicion basicamente ta haci un yamada pa converti e Rijkswet den un ley local, comosifuera nan tin e miho interes di pueblo na pecho. Sinembargo e pueblo no ta lubida: ora MEP tabata parti di coalicion den gabinete MEP/RAIZ, nan mes tabata esun cu a hinca e iniciativa aki den lachi.
Ta simplemente un acto di hipocrecia cu awe lider di MEP, Evelyn Wever-Croes, ta purba di convence pueblo cu e Rijkswet lo mina e boluntad di pueblo y limita poder di Parlamento. E pregunta crucial ta: Unda e preocupacion aki tabata tempo cu su mes colega Rocco Tjon y Ady Thijsen —un di nan cu awe e ta sinta band’i dje den parlamento como oposicion— a sigui instruccion di partido geel pa kita fo’i mesa e opcion pa retene control financiero externo.
E mesun idea cu awe MEP ta pretende di defende, no tabata bon tempo aya, pasobra simplemente no por laga otro traha y haci. Awe milagrosamente si e ta bon. E realidad ta cu nan palabra no tin peso mas, y nan accion ta revela solamente un egoísmo sin limite. Mirando cu sodo di pueblo ta pagando sumanan di interes halto sin wak su beneficio directo.
Fuera di esey, ta bon documenta cu ta Wever-Croes mes ta esun cu a tuma tur stap crucial y cu a pone su firma riba documento cu a trece pueblo Arubiano den e situacion cu nos ta aden awe.
E ta esun cu a compromete Aruba na condicion duro, sin transparencia ni cu su gabinete, ni su fraccion,ni su partido y menos ainda cu su pueblo. Y awe ainda kier pretende di cu nan no ta carga ningun responsabilidad den e siguiente pasonan di continuacion di gobierno.
E contraste ta cla: ora bo tin hende serio y experto cu kier tuma paso concreto pa yega na un caminda di stabilidad y crecemento, versus un MEP cu ta keda scoge pa hunga cu emocion di pueblo, crea division y sembra miedo. E meta no ta otro cos cu boicotia cualkier esfuerso serio y bon intenciona, djis pa den futuro por bisa cu cualkier cos cu bay robes ta bou di gobierno AVP.
Fraccion AVP ta haci e mesun pregunta cu hopi Arubiano tin den nan mente: (*) E hamber pa poder di MEP ta tanto cu nan prefera di sacrifica un futuro financieramente stabiel solamente pa gana un punto politico? (*) E patriotismo cu nan ta predica ta realmente amor pa pais, of simplemente un instrumento pa manipula pueblo y trata di yega back na poder?
Nos pueblo merece hopi miho cu actonan di manipulacion. Aruba merece liderazgo serio, stabilidad y un plan cla pa un futuro prospero. Fraccion AVP lo sigui defende interes di Aruba y no lo keda keto ora oposicion ta abusa di sentimiento di patriotismo solamente pa camufla nan propio iresponsabilidad.
