ORANJESTAD (AAN): Mas y mas keho ta yega na Fraccion di MEP di e veld di enseñansa.
Ta un veld cu a duna sosten grandi na partido Futuro y specialmente na e lider Gerlien Croes. Sinembargo actualmente tin un decepcion grandisimo, y ta wordo bisa cu miho nan a keda cu ex Minister Endy Croes.
No solamente Minister Gerlien Croes no ta cumpliendo cu tur e promesanan cu e mes a haci, sino tambe e ta kibrando tur proyecto cu e ex minister di enseñansa a traha riba dje, proyectonan cu a traha hunto cu e veld, y esey ta un decepcion grandi pa e veld. E minister actual ta manera riba un racha di vengansa, en bes di construi cosnan nobo pa enseñansa.
Aparte di esey e minister ta exigi pa tin control riba tur proceso, pero no ta tuma decision, y pues procesonan ta tarda. Ya caba docentenan cu mester a haña nan ambtsjubileum a keda sin haña nan, simplemente pasobra e minister kier haña tur cos cu mester firma, pero no ta pone prioridad na firma cosnan importante.
Mescos ta conta pa diferente toelagenan cu mester wordo paga na interne begeleiders, primsa begeleiders, etc. Nan tin mas di dos luna ta warda riba e minister. Ta incomprendibel con Minister Gerlien Croes ta causando asina tanto descontento y friccion den e veld asina importante di enseñansa. E veld toch tabata tin 3 aña di trankilidad, pa awor haña tur e negativismo aki.
Fraccion di MEP lo bolbe trece esaki bou di atencion di e minister. Fraccion di MEP a haci e minister cantidad di pregunta, pero e ta nenga di contesta. Ta evalua pa yama e minister den Parlamento pa e duna cuenta riba su maneho.
