ORANJESTAD (AAN): Aruba a experencia un resultado di eleccion cu a marca historia. Un resultado final cu a tarda hopi pa drenta pero na final Aruba a vota pa un cambio.
Den oranan trempan di diasabra mainta Aruba a cera conoci kende ta esnan cu lo bai goberna e pais aki, un pais cu mester un otro direccion y esaki a keda demostra tambe. AVP a resulta e partido di mas grandi un biaha mas obteniendo asina 17.876 voto cual ta refleha 9 asiento den parlamento.
Un lista completo cu 29 candidato, un lista balansa cu profesionalnan di diferente area y concentracion. Un campaña cu a hiba como lema 'bolter cos’.
Jennifer Arends- Reyes a perfila su mes na puesto #6. Esaki ta Jennifer su di 4 eleccion y su di tercer biaha den Parlamento di Aruba. Un candidato cu a bin ta gana e confiansa di Aruba den cada eleccion manteniendo asina un cantidad di voto firme. Un candidata cu a hiba un campaña di nivel, cu contenido serio y cu prueba pa asina por mustra Aruba su seriedad pa cu e eleccion di Parlamento di Aruba.
Como un di e poco candidatonan di e eleccion 2024 cu a campaña fuerte pa turismo. Jennifer a bin ta studia e rapportnan di ATA y AHATA y a bin ta vocifera esaki den varios media cu Aruba mester un cambio y un direccion diferente pa cu nos turismo. Cu poco menos cu dos luna pa campaña rond Aruba, Jennifer su mensahe a yega den cada hogar y cerca cada ciudadano cu su mensahe di prosperidad igual pa tur hende. Un turismo stabil cu mas oido pa nos medio ambiente.
Enseñansa y Economia tambe tabata riba e agenda di Jennifer y aki tambe e la sa di trece su mensahe dilanti na e hoben studiante cu mester di mas guia como tambe e maestronan cu mester di un mihor salario. Nos systema di enseñansa mester wak un cambio drastico y sigur un punto di enfoke pa e proximo gobernacion.
Jennifer kier a gradici di curason na e 507 personanan cu a deposita nan confiansa den dje. Un eleccion cu a wordo yama den un periodo cortico, sin preparacion adecuado pero a sa di lora manga y traha. Jennifer a sa di yega serca di nos comunidad y traha pa e mensahe di cambio yega den tur area. Tur e votonan di confiansa, ta e voz cu Jennifer lo hiba cune un biaha mas pa asina lucha pa Aruba completo, hunto nos ta logra! Gradicimento y gratitud pa Team Jennifer completo. Agradecido pa su Team cu semper a compañe di cas pa cas te de oranan laat di anochi, su team di social media cu a percura pa esnan riba rednan social keda bon informa. Jennifer a yega cerca di e comunidad y cu awe e por ta e 3rd female votegetter di partido AVP y den top 10 di hende muher cu mas voto pa cu eleccion 2024.
Cu un curason completo y yena cu gratitud, Jennifer ta cla pa bolbe demostra Aruba cu Jennifer tey bek y cu hopi animo pa traha y hiba Aruba dilanti manera semper.
